公關B在某公司企業傳訊部任職，今年年初開始負責處理客戶投訴事件，最初頗為清閒，要處理嘅投訴寥寥可數。唔知點解，過去幾個月來，投訴大增，而且唔係直接寫信嚟投訴嘅，幾乎全部都係透過報紙投訴版轉過嚟。公關B老細大為緊張，督促佢盡快應付記者，誠恐一下唔覺意，怠慢咗啲記者大佬大姐，會俾人彈多兩嘢也。
大凡投訴，梗係要向有關部門仄清楚，研究客戶私隱權，先至可以向記者回覆，所以公關B都做得幾索氣。最近碰到一單報紙轉介客戶投訴，查咗好幾日，卒之搵到投訴人H先生，同佢喺電話講咗一輪，H先生說：「我冇向報紙投訴過喎，點解報紙會代我向貴公司投訴呢？」公關B為之氣結。
諗諗吓覺得咁搞法，實情係浪費公司資源，於是向老細反映，向營銷部門了解，知道有啲營銷人員被勸喻離職後，可能有個別條氣唔順嘅教唆一啲客戶為咗一啲小事就向報紙投訴或者自己冒客戶之名，打電話去報館，故意麻煩吓公司，因為𠵱家啲傳媒夠惡，公司唔敢唔騷也。
公關B知道之後，如洩了氣的皮球，冇晒計，因為呢類鬼影投訴，防不勝防，唔處理就一定俾記者詐型，筆在佢手，點知佢會點寫噃。