個市波濤都幾大，恒指埋單唔見259點，好友重創。中移動（941）以內部資源購母公司餘下10省GSM網絡，作價250億元，呢件係好新聞，股價曾逆市升45仙，最低跌45仙，收市微跌25仙，如果唔係大市氣氛唔就，已彈咗上去。
大市未玩完，中移動有注資好消息撐住，遲早彈番上去，值得趁低吼吓相關Call輪。上周五推介嘅9902，係時候翻兜，明年2月到期，輪價24.4仙，溢價3.4%，槓桿率9.4倍，其餘諗得過嘅有9929。中移動Call輪有好幾隻高溢價高槓桿率，如果正股彈升幅度強勁，佢哋嘅爆炸力會盡情發揮，但若然驚住睇錯正股嘅走向，又想博吓，則宜取低溢價輪。
恒指前日最高12740，昨日以最低計，散咗574點，部份係中銀（2388）拖累，估計好快會有技術反彈，最理想係再落多些少，趁低買恒指Call輪。
恒指Call輪有55件，不過真正有熱鬧交投嘅只有13件，睇個市反彈買Call輪，最好喺呢堆大成交嘅Call輪中搵對象。唔識計數嘅，避開啲有×或星符號者，可留意9104、9237同9209。
章 盛