朋友嘗試比較《無間道》三部曲和杜琪峰全男班風格，其實冇得比，睇個人胃口。
《無間道》角色像出入政府總部的高級公僕，身光頸靚，手機電腦名貴音響魚翅瓣瓣落齊。差人出事，律政司授權，用納稅人錢免費去睇美女心理醫生，還跟醫生擦出癡情火花，春眠不覺曉。那邊廂警隊新秀被燉冬菇，降職的辦公室不知幾好景，還可以保住降職前的靚車位，有心提攜他的總警司，不離不棄，幫他復職。點解咁好死？電影無交代，講義氣嗎？不見得。唔講金講感情嘛，心理醫生唔知為乜落叠，鍾意一個無句真話的黑社會嘍囉。男主角的靚皮褸和白襯衫沒法解釋深層的戲味，惟有以眼神傳意。但黎明眼鏡背後永遠碌大雙眼，表達了甚麼無底內幕？他的fans可以不計較，觀眾實事求事倒給搞胡塗了，唔明幾個男主角由始至終似笑非笑，哥兒們到底搞邊科。
杜琪峰的《PTU》對白不多，全片義薄雲天的戲味由頭到尾，唔使問阿貴。任達華替林雪掩飾失槍烏龍事，瞓身帶領手下幫拖尋槍，原因寫晒在表情上，講明都譖，麻甩佬使乜扯起左邊嘴角微笑才算交心。同樣是警匪世界，杜琪峰描繪機動部隊的團隊魅力，是對前線的讚歌，拍攝地點在三山五嶽的老尖和廣東道。《無》片是員佐級境界，中環金融景，差人是SoHo區型人常客，家住干德道。一個麻甩不修邊幅，一個姿整去觀瀾打高球。兩種男人生態，各有擁躉。