日本球星中田英壽去咗歐洲踢波五年，我羅拉雖然唔知佢喺意大利有幾出名，但就肯定日本人當正佢係國寶，所以壽仔本新寫真集《AmorePace》未出，好多日本雜誌已搶先介紹。
壽仔畀人嘅感覺係女伴轉完一個又一個，鬼咁花弗，但佢喺寫真集度就將自己塑造成一個思想同生活都好簡單嘅男人。首先本書嗰名都叫做《AmorePace》，係意大利文嚟嘅，意思係「愛與和平」，同美少女戰士嘅口號一模一樣。
寫真集入面啲相，係壽仔呢五年嚟斷斷續續咁搵攝影師宮本敬文，跟住佢漫遊洛杉磯、意大利、俄羅斯、羅馬尼亞同肯雅，每到一處壽仔都好友善咁同當地人合照，唔講重以為佢係聯合國親善大使。
所以我羅拉覺得書入面比較值得睇嘅，就係壽仔嘅小小心底話，佢話自己成日俾外界誤解，佢只係一個好奇心旺盛嘅二十六歲青年，其實都幾孤獨，例如壽仔喺意大利除咗比賽同練習，都係一個人行街買衫。乜唔係識女仔咩？不過壽仔話𠵱家乜都唔介意，佢話：「最重要都係自己點諗啫。」