短線遊：大海變市鎮
古廢堡看今日將軍澳
昔日嘅調景嶺面向一片海灣，但係如今，大海已變成了將軍澳新市鎮，人口稠密，地鐵穿梭。再沒多少人知道，呢度亦都曾經山明水秀。今日，我跟隨在調景嶺長大嘅譚先生，重踏佢兒時走過嘅山徑。原來喺寶琳南路嘅茅湖山上，重保留咗一個廢堡，上到去重可以睇晒將軍澳全景。
記者：陳震霖
攝影：陳細權（部份圖片由譚錦泉先生提供）
Model：Erica（SunSpot）
調景嶺滄海桑田
60年代
70年代
80年代
起點/終點：將軍澳靈實醫院
行程：寶琳南路→澳景路→上山看十字架→折返澳景路→寶琳南路→上山尋廢堡
行程需時：約4小時
去程尋十字架
行程的起點係將軍澳寶明苑對面山頭嘅靈實醫院，上山沿寶琳南路步行大約20分鐘，喺路嘅盡頭，會見到一間充滿五六十年代建築色彩嘅小屋，呢間竟然係將軍澳唯一嘅佛院。咦，點解呢間普賢佛院嘅左上方有個瞭望台嘅？唔通呢頭治安好差？當我諗爆頭之際，譚先生就話：「佢之前係調景嶺警署嘛。」哦，當頭棒喝。
從普賢佛院左面嘅樓梯落山，多行20分鐘，便會接上澳景路，開始「登苦路」嘅行程。澳景路山坡有個十字架，係以前唔少天主教居民嘅精神食糧，佢哋將登山朝拜嘅呢條路叫苦路。現在，呢度變成咗晨運熱點。
回程找廢堡
以往行山，通常梗有鳥語花香嘅感覺。不過呢條路好似就欠缺咗少少色彩繽紛嘅植物點綴一下。「喂！你哋快啲嚟睇。」同行靚女嚷着。哦，原來佢發現咗一片向日葵。雖然花就唔算太多，不過走去嗅吓花香都唔錯。
廢堡在茅湖山的山腰，規模唔算大，而且相當殘破。圓形主室同旁邊嘅屋仔都已經冇晒屋頂。至於廢堡的歷史，資料甚少，連地膽譚生亦只知道，這可能是英軍留下的建築。不過，即使佢嘅歷史價值唔大，通過圓形主室嘅窗，用有趣嘅角度欣賞將軍澳嘅景色。
今昔對照
最後，我哋喺同一個角度，畀大家睇睇將軍澳嘅變遷。攝於八十年代嘅那張圖片，圖左嘅建築物叫紹榮鋼鐵廠；同一個地方，係今日嘅維景灣畔。海中心魚排對開嘅地方，𠵱家就係彩明苑同唐明苑。只係二十年，原來可以面目全非。
接着我哋由原路折返普賢佛院，再由佛院朝靈實醫院方向往回走，登山尋廢堡的路就在附近。咦，路旁出現了一條小溪，竟有人喺度游水嘅？原來係一對已移居加拿大嘅夫婦，佢哋昔日係調景嶺嘅居民，今次專程同埋佢哋嘅外國朋友重遊故地。大家都不妨喺呢度用冰涼清溪水洗洗手，充充電再上路。
登山入口喺離開小溪約5分鐘路程，要搵廢堡，大家就要記住呢個鐵絲網啦。捐入去就有路上山，呢度已經離廢堡唔遠㗎啦，只需走約30分鐘。
交通：乘坐綠色小巴107號（$3），來回寶琳地鐵站及靈實醫院。
80年代
2003年
此情不再
昔日嘅調景嶺，記載住當年逃到香港嘅國民黨軍人艱苦嘅生活歷程。50年，這群「難民」被安置到調景嶺，這裏交通隔絕，缺乏水電供應，後來憑居民嘅努力，將它改造成一個繁榮鄉鎮，當中包含不少居民嘅血汗。隨住將軍澳新市鎮的逐步擴展，調景嶺的獨特色彩，亦只有化為歷史。
