演藝前輩星光大道打手印
馮仁昭四圍超：馮寶寶生得矮點漏名

香港旅遊發展局噚日喺新世界中心廣場舉行星光大道第二次打手印儀式，今次受到嘉許嘅演藝界人士有吳思遠、姜大偉、洪金寶、徐克、許鞍華、馮寶寶、凌波同甚少露面嘅息影女星夏夢。

設基金培育下一代
當司儀陳欣健逐一叫嘉賓上台打手印時，竟然漏咗馮寶寶，要現場記者提佢佢先至知，寶寶姐惟有自嘲自己太矮，陳欣健睇佢唔到嚟打圓場。而噚日寶寶姐個老公，同寶寶姐同前夫所生嘅仔招啟宗都有嚟撐場，認真大陣仗。
另外，姜大偉同記者講到「張徹武俠基金」嚟緊會籌拍電視劇，啲收益會撥歸基金，然後每年將基金撥畀有志喺電影行業發展嘅學生去讀書同進修。

歐陽震華鴨寮街水晶慰妻
歐陽震華（Bobby）、向海嵐同黎耀祥等，前晚喺深水埗一間酒樓拍攝無綫新劇《鴨寮下的金蛋》。今年聖誕節Bobby將會喺工作中度過，佢話連續幾年都係咁，所以都冇乜所謂，佢重話：「冇時間買聖誕禮物畀老婆，呢排喺深水埗同鴨寮街開工，或者喺呢頭揀吓水晶送畀佢啦。」咁識就地取材呀！

王菲增高四呎冧觀眾
王菲喺呢個星期六開始八場紅館個唱，佢嘅形象指導TiTiKwan就幫佢搵咗VivienneWestwood贊助一對本來只供鑑賞嘅十吋高嘅金色高踭鞋，再加上戴住個三呎嘅頭飾，以阿菲五呎八吋嘅身高，到時紅館舞台上就會出現一個近十呎嘅王菲，用呢個方法嚟拉近佢同山頂觀眾嘅距離，都幾非比尋常喎！