「阿妹！嚟碟焗魚腸！」「阿妹！整兩支啤酒！」「妹」聲此起彼落，熱鬧哄哄。原來這間大牌檔的檔主是三個二十歲出頭的「靚妹」，是名副其實的「妹記大排檔」。
記者：李湘虹 攝影：黃子偉
檔主之一的羅小姐今年才二十二歲，幾個月前還在做文職，突然覺得要「變」一下生活模式，出外面闖闖，於是連同她兩位朋友一齊搞大牌檔。
她說：「我哋三個都鍾意食大牌檔小炒，又鍾意同人傾偈，經常夜晚一邊食一邊飲酒傾到天光。」但「靚妹」搞大牌檔，有點攞苦嚟辛吧？「之唔係！以前寫字樓工朝九晚五，有靚衫着，有冷氣歎，點似得𠵱家，成日攬圍裙着水鞋，日日做到凌晨三、四點重要洗碗，咁耐都未放過假。初頭做到晚晚聲失腳抽筋，惟有自己匿埋喊。但喺人客面前又要扮堅強扮好掂，唔可以俾人覺得我哋『靚妹』無用。」
有沒有試過俾人「蝦」？「做落其實呢度嘅人冇乜嘢，人流又唔雜，個個都好豪好爽，好多客都變成朋友，經常訂幾圍食蛇或者擺生日酒，好似平民私房菜，最緊要就係客人食得高興！」客人想怎樣也行？「係呀！有啲客鍾意飲紅酒，我哋呢度都準備咗紅酒同高腳酒杯。而且啲客要有新鮮感，我哋就經常換菜牌，周圍出去試食，再返嚟同師傅一齊『度』吓創新菜式。有時整到款客人鍾意嘅菜，嗰種成功感真係好爽，可以暫時唔記得辛酸血淚！」
秘製鋼鍋雞$68：先把半隻新鮮雞切成塊放大黑鑊炒十五分鐘，其間鬚哥要不斷勁「兜」，加入秘製香料包括八角、泰國香草等，配以金針雲耳，煮至八成熟，再用鋼鍋在爐上煲五分鐘，最後原鍋上枱，熱騰騰兼且香味濃郁。
缽仔家鄉焗魚腸$58：製成後外形有如放在「乞衣兜」內的日式芝士蛋糕，十分有趣。試一口，先是鬆脆香口如酥皮的表層，食落主餡卻是滑嘟嘟的雞蛋，蛋中又藏着爽口魚腸，一缽三種不同質感，認真過癮。
食客兩句
妹記大排檔
電話：27212123
地址：尖沙嘴金巴利街28號金巴利美食廣場G2舖
營業時間：平日11:00am-1:00am；星期日及公眾假期6:00pm-1:00am
座位：約200
