試想像一下，當你正在公路上享受駕駛樂趣之時，倒後鏡一角忽然閃出鐵騎巡警嘅身影，你勢必會精神稍稍一振，打醒十二分精神駕駛，同埋會諗諗自己有無違反交通條例；不過唔使太擔心，因為大家睇到嘅，可能只係好似今日介紹嘅一班警車愛好者咁，正在遊車河而已。 記者、攝影：畢明
協力：David
大家除可響警隊開放日之類嘅活動，過吓鐵騎巡警癮之外，最直接嘅方法莫過於自己擁有一部退役警察電單車；其實政府使用嘅車輛，到達一定年期後就會退役，而呢類退役車輛將會被拍賣，就連警隊所使用嘅電單車亦唔例外。以往有人話呢類警車響拍賣後，不能再喺本港登記出牌，導致一直以來警用電單車未見落入民間使用；但呢個情況已經不再，故此即時惹來不少警車迷追捧。
呢班鐵騎巡警迷，更於今年成立咗一個名為「香港CBX750電單車愛好會」嘅非牟利及義務團體，不但經常相約一班Fans出外遊車河，同埋交流心得之外，重會為其他團體作義務工作，服務社會㖭！
從名字上可以睇到，呢班警車發燒友迷上嘅，會係於警隊內服役時間最長嘅交通警用電單車——本田CBX750P；呢款生產自80年代初期嘅電單車，警用版正名係CBX750P，係屬於CBX750Horizon車系嘅其中一個變種，特點係性能可靠及維修容易。
另一方面，除本港警隊有使用CBX750系列嘅電單車外，就連消防處、民安隊及醫療輔助隊等嘅紀律部隊，甚至乎係其他國家及地區嘅政府部門，都有使用呢款電單車㗎！
當大家睇到呢類咁威風凜凜嘅電單車，就知道騎上去巡航時有幾過癮，但大家可能會擔心，駕駛呢類退役警車在道路上行駛，會否有冒警之嫌呢？據車會負責人王先生表示，只要車身上嘅貼紙，並無顯示「警察」或「Police」等字眼，而車上紅藍色警示燈沒有接線及不能使用的話，基本上唔會有太大問題。
不過，咁油缸上嘅警徽又有無問題呢？「哦！嗰個其實係1997年回歸前所使用嘅舊警徽，事關現時香港警察已改用全新徽號，故此同樣不成問題。」會長王先生笑着說。
若大家想擁有呢類退役警察電單車的話，方法好簡單，首先要留意報章上有無警方或其他紀律部隊拍賣退役車輛嘅通告，但近年政府財赤嚴重，因而令警方換車計劃放緩，所以可能要等一段較長時間，才會有退役車輛被拍賣。但如果你急不及待想買番部的話，亦可透過一啲早前悉數投到一批被公開拍賣政府車輛嘅公司，以每部約$9,000嘅價錢購入㗎！
不過，據會方嘅經驗，呢類車由於損耗情況唔同，故此購入後都要送入車房檢查及大修，然後再重新驗車，合格後便可到運輸署登記出牌，呢啲費用連車價加埋約需二至三萬元。若大家都想購入一部退役警察電單車，又或者加入佢哋車迷會嘅行列的話，不妨向會方查詢，佢哋會好樂意提供協助。
有用網址：
關於本田CBX750P電單車嘅中文資料：
香港CBX750電單車愛好會網址：
