港交所前行政總裁鄺其志自從退下火線之後，不斷向特區政府發炮，大家以為佢老哥太寂寞，想重出江湖，出選○四年立會。但鄺神童矢口否認，八方聽聞鄺兄已經搵到好路數，加入新昌，幫葉謀遵博士手。
呢個世界永遠出人意表，想九八年政府入市後，鄺其志奉煲呔曾之命，收拾聯交所、期交所以及香港中央結算等機構，以免再俾大鱷有機可乘，衝擊香港金融體制。當時葉博士正正係期交所主席，喺冇得選擇嘅情況下交出帥印，由鄺神童嘅港交所吞併，估唔到兜兜轉轉，佢老哥會投入葉博士旗下。
前高官從商非新鮮事，何況鄺兄已經離開政府，如果屬實都係好事，話晒葉博士重才，葉家遇上有能者會讓位，又成日提住要引入專才，神童亦有番咁上下工夫，合晒資格。
葉謀遵𠵱家重係新昌集團主席，上市公司新昌營造就交咗畀個仔葉維義做話事人。
傳真︰2623-9278
電郵︰