鄭伊健噚日五點幾一個人揸住架奧迪四驅車，途經清水灣道出九龍，點知前面架白色貨Van突然急停轉右，伊健即時急煞，但係跟住佢後面架綠色私家車收掣不及，砰一聲撞埋伊健架車。發生交通意外，伊健唔識處理，即call朋友嚟幫手，然後報警。
好彩伊健架奧迪夠硬淨，只係花咗啲，反而架綠色雅廓個頭爛晒，伊健見到咁嘅情況，都唔好意思鬧個女司機，重調轉頭安慰人哋，猛話冇事唔使驚。個女司機個樣真係好驚，重話驚到唔認得伊健㖭。
伊健問警察可唔可以追究架白色貨Van司機，警察同佢講話冇得追究，邊個叫佢跟車太貼，馮仁昭問伊健會唔會追討賠償，佢話：「可能claim保險啦。」咁又係，雖然人哋撞你，但佢架車重傷過你，花咗少少重邊忍心要人賠？佢咁善良，難怪梁詠琪對佢咁死心塌地啦！
梅艷芳原定前日去新加坡宣傳新書，順便幫兒童癌症基金會籌款，但最後去唔成，由蘇永康同張衛健頂上。蘇永康話阿梅𠵱家嘅身體情況穩定，但係因為呢排香港天氣變化大，而且醫生同朋友都覺得佢唔係太適合坐飛機，連劉德華同張學友都有份做說客，最終說服咗阿梅唔去，咁多人關心梅姐，梅姐真係要好好保重啦！
張堅庭噚日喺將軍澳電視城接受鄭裕玲﹙嘟嘟﹚主持嘅節目《不一樣的時刻》訪問，而張堅庭會接嘟嘟棒做呢個節目嘅主持。嘟嘟話已經準備好喺聖誕過一個浪漫節日，馮仁昭知道嘟嘟買咗一棵聖誕樹，佢話：「係呀，我會布置同埋搞小型派對，休息吓就係我嘅未來大計。」
何韻詩噚日去商台接受訪問，佢話原本決定噚日出新碟，但因為成隻碟嘅包裝製作需時，所以要遲幾日先推出。阿詩話今次個封套好特別，原來佢將自己個樣變成好似芭比公仔咁，不過馮仁昭睇過個公仔，覺得唔多似佢，所以喺隻碟上面都要加番張阿詩嘅相，唔係一陣啲fans買錯碟咪弊？
亞視向來令人覺得佢資源唔多，但估唔到佢哋拖欠快必、慢必嘅酬勞大半年，亞視噚日喺新劇開鏡時由高層透過傳媒向快必、慢必致歉，話已經發咗張支票通知佢哋嚟攞。陳煒噚日出席開鏡儀式力撐亞視，話拖欠薪金從未發生過在自己身上，而且糧期有早冇遲，相信今次快必、慢必事件只係出咗少少混亂喎，佢咁講嘢，真係識撈。
黃貫中（阿Paul）噚日帶咗隊新band荔枝王上商台，原來阿Paul非常欣賞佢哋嘅音樂，所以就以投資者同監製身份同佢哋合作，阿Paul重大讚荔枝王四位成員都係好健康，而且會將啲表演收入回饋做善事㖭。馮仁昭覺得又有音樂聽，又做善事，何樂而不為呢？
