與靚女C約會完畢，行轉頭就碰到女分析師W，於是問佢金融業係唔係好好景？分析W話：「不在話下啦，日日做到索氣，寫分析報告都寫唔切，客戶與經紀日日問貼士（推薦股份），真係死得唔病得。」
以往年近聖誕，大家都進入假期mood，做嘢放慢手腳，今年唔同晒，淨係臨年尾幾單國企股上市，所有保薦人、律師、核數師、印刷商、公關公司都疲於奔命。講到國企上市，中國人壽轟動全城，分析W個阿媽都攞咗一份黃表，但唔識填，放喺屋企等分析W。分析W嗰晚十一點幾先返到屋企，承慈命填表，幾乎瞓着咗，但畢竟佢係證券界專業人士，逐行逐格都要睇清楚，居然俾佢捉到錯處，就係截止申請新股日期，英文係December18，但中文就寫成十二月八日。
分析W話：「呢啲標準表格，點可以錯日子㗎，冇人校對嘅咩？保薦人有責任核對清楚所有資料正確無誤噃！」招股文件，從來都以英文為優先，中文只係翻譯啫，如果英文文件改完又改，改到最後一秒，做翻譯嘅就非常索氣，保薦人嘅負責職員（地位唔低㗎）喺招股書出街前一晚，一定冇覺好瞓，問吓梁伯韜就一清二楚。水皮如左丁山，當年亦曾半夜在印刷商公司嘅接待處瞓過梳化。正是忙中有錯，不敢予以深責。近來啲招股書，本本似電話簿，校對肯定眼睛又黑又紅，印刷商就會笑到個嘴都抽筋！