股市噚日真係多事。美軍活捉侯賽因，利好，對股市有刺激，亞洲時段S&P已大升15.5點，而日股亦急升321點（升幅3%），但中銀（香港）（2388）大股東配售舊股，集資近120億元，則利淡，令港股高開低收，背道而行，恒指早段曾創下12740的本年新高，之後就一路走軟，結果低收12520，倒跌74點，而期指收12540，高水縮窄到只得20點。
除好淡消息外，噚日上市嘅長城汽車（2333），高開22元後一路回到17.05元最低收，但比上市價（13.3元）仍有28%進帳，散戶全面計賺錢數。另外，國企終於出現一次較為「似樣」的調整，指數最低之時曾跌逾230點，收市4289，跌172點，跌幅3.8%。國企升咗咁多，唔調整，真係好難再落手。
中銀「披成」，數目唔細，8.68億股每股13.7元，成120億元，但唔使一個鐘頭，就被搶認一空，香港地真係「水」多到浸上眼眉。由於中銀大折讓（12%）配股，噚日個市就只有跌定先，因為中銀佔恒指成份4.27%，若跌2元，拖低恒指成70點。今日中銀復牌，若唔低過14元，大市可回升。
噚日推介的新世界發展（017），收5.7元，升1個位，買家仍好有耐性收集，收市若升破5.75元，則升浪確認，最少可見7字頭。另外，遠東發展（035）同東強電子（615）同樣逆市而升，呢幾隻都係大行同基金一路買重嘅股票，後市升幅會好可觀。
東強高收1.22元，升3仙，創出6年以來新高，並衝破3個多月來的大圓底頂部阻力，以量度升幅計，短線目標指向1.5元。上月中，有公開持股資料的3家基金，合共持股16.45%，近日已加到18.39%，事實上，東強現時的PE重係好低，以03年度（12月年結）預測每股盈利18.6仙計，PE只為6.5倍，04年度產量增加，每股盈利可上升到20.5仙，以保守的8倍PE計，股價已可見1.64元。
噚日收到料，話德信科技（1228）喺未來一兩個月內，會密密有大動作，聽聞芬佬亦開始對佢產生興趣，會趁佢新廠月底落成慶典之日，實地視察一番。德信「晒士」細，只得4億元，芬佬若上車，股價好大機會翻一番。
郭兆誠