前任財政司司長梁錦松終於獲得董政府不予起訴待遇，理由係「冇合理機會」可以勝訴，於是阿松就毋須受過堂之辱。
不過，咁樣其實更加係害咗阿松㖭。點解？因為一個人，好似阿松咁，到呢個地步，最重要就係名譽。若果律政司覺得告阿松勝訴唔高，咁點解唔光明正大，由法庭去正式同阿松還一個清白，而要阿松帶住「以權謀私表面證據成立」嘅污名過埋下半世？
阿松笑騎騎，或者到咗呢把年紀，已經唔再計較，但呢筆胡塗帳，從此記載香港歷史，阿松係開埠以來第一個因偷步買車而被迫辭職嘅財政司司長，女細老婆嫩，阿松個女大個咗，會點睇個爹哋？
江樂士話，唔告阿松，因為怕勝數唔高，即是話覺得自己牌面唔夠大，無謂跟多一張牌。之不過，告就一定輸，咁梁愛詩點解唔掟多兩三百萬，睇埋法官嗰張牌，等阿松正式得回清白，喺小伏面珠錫一啖，昂首挺胸舉住個Ｖ字手勢大步檻出法庭？
或者董班子又怕立法會嗰陣時鬧，話係浪費公帑。之不過，呢個政府浪費公帑，都浪費足六年，搞場巨星匯，就浪費足一億，俾滾石樂隊袋咗幾千萬走人，咁都做得出，點解唔浪費埋嗰兩三百萬，輸多場官司，等阿松正式脫罪，由法官證實阿松真係有高尚情操？
弊在江樂士又講啲唔講啲，佢承認阿松謀私，唔係冇證據，起碼有表面證據，就係買完新車唔申報，跟住就發表加汽車銷售稅嘅財政預算案，咁先至毒，即是話：呢條友唔係冇做衰嘢，我哋心知肚明，不過落鑊就未夠秤，姑且俾佢走甩今次，咁解。咁你話係保阿松定害阿松呢？都係痕正會議某親中高人當日諗嗰條橋高：既然告阿松，政府都會輸，但起碼擺一個姿態係公正，不如就將阿松落落鑊，保住董班子名聲。
所以今次，董班子求其諮詢兩名大律師咁多，就匆匆決定開門鬆綁放阿松，再孭埋袒護高官、「刑不上大夫」嘅歷史責任，董班子形象再受打擊。
何況，八方想提醒吓啲土共：江樂士係鬼佬，諮詢意見嘅祈理士、韋爾森兩名大律師，又係鬼佬。會唔會係啲鬼佬夾埋，特登誤導阿董同詩姑，等佢哋好似唔告胡仙一樣，唔告阿松，令到董班子蒙上護官徇私嘅形象，打擊特區法治地位？鬼佬講嘢，一向信唔過，因為鬼佬好唔想我國強大，亦唔想香港好，所以《基本法》先至規定，司局級官員唔可以由鬼佬做。唔告阿松，由三鬼決定，一齊誤導智商公認唔係咁高嘅阿董同詩姑，由愛國嘅角度睇，大有問題。
不過，冇所謂喇，巨星匯一鑊泡，咪又係英美兩國鬼佬玩謝阿董？港人治港，俾阿董搞到一鑊泡，鬼佬緩緩增加影響力，香港人都會歡迎嘅。
傳真︰2623-9278
電郵︰