八方噚日聽鄭大班嘅《風波》節目，聽到單古仔都幾搞鬼。話說有鄭小班之稱嘅立法會議員鄭家富，上周五好鬼浪漫咁帶埋太座去中環蘇豪區食飯，到九點零十點，佢見警察抄牌，就飛撲埋去護車，重同位警察哥哥講，話前一哥曾蔭培都講過，為咗刺激經濟，泊車喺街邊唔阻街嘅話，唔會抄牌，啲車泊喺蘇豪區都唔阻住交通，點解要抄牌呢？
鄭家富雖然夠晒牙尖嘴利，但正所謂人亡政息，何況差人唔知係咪知道鄭家富係民主派，亦即土共仇人，正所謂西瓜偎大邊，就窒番佢轉頭，「一哥都落咗台啦，你講乜嘢呀，重有，你要講就去立法會講」。當堂激到鄭家富出晒煙，打去大班度訴苦。
冇錯，呢位警察哥哥係公事公辦，冇俾尊貴嘅立法會議員嚇窒，但係曾一哥都不過係離開咗警隊幾日啫，差佬都咁現實，又點怪得近日開始棄阿董船嘅土共呢。
傳真︰2623-9278
電郵︰