本來借住侯賽因落網消息，港股點都會有得益，奈何中銀（2388）做「披成」，個市好完一陣散落去，國企指數跌172點，幅度大過其他指數。
中銀「披成」作價13.70元，低過停牌前12%，第日復牌，點都要跌，估計係14元嗰頭，恒指昨日跌幅，未反映呢個因素，所以揸恒指Call輪有少少唔着數。不過咁，美股對老侯成階下囚消息，應有較強烈反應，有機會將港股拉番高啲。可以吼低執啲恒指Call輪博反彈，或者炒吓年底例旺，對象係昨日所提嘅9237、9230同9220，3件都係易買易賣貨色。
成交大而上榜嘅窩輸，有國企指數Put輪9369，收20.7仙，升24%。明年6月到期，壽命雖長，但槓桿率7.7倍，溢價19.8%，唔值得。
國壽（2628）後日掛牌，如果表現靚過長汽（2333）（機會好大），分分鐘拉動啲國企，揸住Put輪要捱打。𠵱家應該反為吼低揸國企指數Call輪，3個對象，係9317、9327、9363，數據好實際。
死火輪榜上，石油Call輪佔最多，3件主角石油股跌幅4%至6%，啲輪冇法子唔縮水。提到老侯，對油價不利，呢個影響相信會持續一段日子，石油Call輪暫時買唔過。
章 盛