金球影后雲妮絲惠嘉（ReneeZellweger）近年發展一帆風順，接片約接到手軟，遲啲佢又會同金像影帝羅素卻爾（RussellCrowe）合作新片《CinderellaMan》，不過如果講到最令觀眾印象深刻嘅電影，我羅拉諗好多人都會話係賣座喜劇《BJ單身日記》。
相信好多影迷都重會記得肥嘟嘟嘅雲妮係戲入面嘅撞板演出，講真呢部片亦都令佢豬籠入水，事關佢○一年拍《BJ》嘅時候，片酬只係得二千九百萬港元左右，但係最近幾部戲片酬已經累增至七千八百萬，跟住《BJ》間電影公司重出到一億一千七百萬請佢拍續集㖭。
既然畀得咁多錢雲妮，當然要有啲付出，所以佢今次又要再增肥番接近三十磅。雖然續集《BridgetJones:TheEdgeofReason》下年先上，但其實個故事只係發生喺第一集嘅四個星期後，上集肥BJ最終揀咗老實型嘅哥連卓夫（ColinFirth），不過今集佢已經開始對佢哋嘅關係唔多志在，另外，身為電視台記者嘅佢亦都要周圍採訪，扮鬼扮馬之餘，重要飛上天玩埋降落傘㖭。