碧咸唔通真係同啲阿根廷人有仇？繼施蒙尼同德舒拿後，禮拜日佢又同拉科嘅史卡朗尼埋牙。
前晚睇皇馬大戰拉科，話說碧咸喺後場甩拖，俾史卡朗尼食咗位重搶埋個波，於是就喺後面踢人，史卡朗尼火滾轉頭想郁已經做咗滾地葫蘆嘅碧咸，好在卡洛斯立即攬住史卡朗尼，否則就大件事！
結果兩人各領黃牌，賽後史卡朗尼指斥碧咸曾向佢做不文手勢，所以覺得碧咸冇品，唔同佢握手。我求大俠認為碧咸今次唔啱在先，之不過史卡朗尼咁激烈嘅報復行為又係唔爭得落，球證有權趕佢出場。
碧咸出道以來同阿根廷球員特別多過節，如果施蒙尼係前傳嘅話；咁德舒拿就係續集；咁就希望史卡朗尼係大結局就好嘞！
「白頭佬」拉雲拿利冇嘢撈，最近話夢想返意甲效力，重提到最想返去出生地佩魯賈踢波。「白頭佬」已無復當年勇，要出到人情牌謀生都算幾坎坷。我求大俠都祝福呢個踢過好多間球會嘅「浪人」，希望佢咁樣動之以情，最終都幫佢賺番張飯票啦。
格拉斯哥流浪喺歐洲賽出局，喺星期日嘅聯賽重三十年嚟首次作客輸畀鄧弗姆林；但領隊麥利殊就話已經同歐塞爾嘅法國後衞保桑簽咗協議，會喺季尾後免費加盟。保桑喺流浪嘅周薪要四萬五千鎊（約五十八萬五千港元），而遠水救唔到近火，麥利殊照顧吓球隊𠵱家嘅情況好喎！
今季英超聯都真係名副其實「三強鼎立」，前列阿仙奴、曼聯及車路士已經拋離第四位嘅富咸十幾分，好難追囉！講開第四位，今季好多隊坐過之後幾乎實輸波嘅，好似之前曼城、伯明翰、查爾頓、甚至𠵱家嘅富咸！睇個勢應該到紐卡素上嚟，希望唔好一上到第四又輸波啦！
曼聯剛授權一跨國網頁公司，將官方球衣外銷至中國大陸！我求大俠唔係潑冷水，國內𠵱家其實都有唔少球迷已經擁有曼聯波衫，好大部份重可能係「番梘」貨㖭！須知道國內目前對知識產權呢樣嘢嘅意識重係差少少，想賺「人仔」，不如親自過去踢多兩場表演賽好過啦！