原本美國捉到侯賽因，金融市場應該好高興，噚日港股一度勁升，突破12700，可惜油價因侯賽因被捕而下跌，石油股回軟，加埋中銀趁機配售中銀香港（2388），抽水百幾億元，即刻令市場打個冷震，最慘就係中銀香港配售價13.70元，較上周五收市價大幅折讓逾12%，聽講吸引唔少炒家認購，企圖賺差價搵快錢，所以中銀香港復牌，相信沽壓唔會細。
以往不時都有傳聞，話中銀想配售中銀香港，但直至噚日才落實，市場反應快，立刻聯想到中國電信（728）、中移動（941）同聯通（762）都有機會配股集資，搞到內地電訊股全面報跌，通過向母公司收購六省市網絡的中電信跌5.2%；正洽購母公司十省市網絡的中移動跌0.85%；已決定向母司收購十省市網絡嘅聯通則跌2%。
長城汽車（2333）首日上市，有經紀在開市前時段手多，一度將股價Mark上100元，散戶睇見當然心雄，不過就冇真正成過100元，但亦反映情況頗為瘋狂。長汽高開22元，唔少股民見好即收，馬上出貨，長汽高開後一直偏軟，貼近全日低位17.05元收市，升幅收窄至28%，成交14.7億元。
金價雖因侯賽因被捕而回軟，不過市場認購紫金（2899）熱情未減，國際配售部份傳出有數十倍超購，公開認購部份亦相當熱鬧。不過黑客擔心如果金市及港股氣氛進一步轉差，股民於上市首日可能大舉沽貨，到時紫金未必守住招股價。
阿 虎