自由行引發香港樓市熱潮，內地客來港買樓成為市場報道焦點，但原來內地樓市氣氛都唔差，番禺祈福新邨迎風閣今個月初開賣，兩日就賣咗約二百套單位，銷情重好過香港。
聽講當日早上九點鐘，售樓處已經坐滿買家，呢啲場面香港發展商一定好渴望見到。祈福新邨發展商唔敢怠慢，售樓部所有同事要總動員，為買家辦理手續。
個盤嘅八個連花園單位，總共有十幾個買家搶購，自然一早賣清啦，其他千二呎嘅三房單位，都賣到斷晒市。原來內地人嘅購買力咁強，唔怪得香港發展商都要攞啲盤去內地推銷。
蘭西記得今年內地樓盤，間唔中都見到有熱賣嘅場面，有啲重通宵排隊，但係一個發展超過十年嘅樓盤，都有咁熱烈嘅入市氣氛，應該唔係咁多見。
西鐵今個禮拜六通車，發展商借鐵路效應清貨。南豐集團荃灣翠豐臺，就食正區內有西鐵荃灣西站概念，南豐賣樓話事人麥一擎話，集團將投放二百萬重新推廣呢個盤，宣傳攻勢由聖誕節做到農曆新年，咁落本，主要都係炒西鐵熱潮。
今次南豐集團重委託中原地產做翠豐臺嘅跨年份代理，為表誠意，噚日中原特地做咗個成六十幾呎嘅大型布景板，為翠豐臺打造DreamHouse品牌。
個巨型布景板布置到成間屋咁，似足迪士尼嘅布景，幾別致，睇樓客大可影張相留念。
鴻運地產喺今年二月突然宣布自動清盤，員工唔只冇咗份工，連薪水都冇着落，大家都預咗收唔番，惟有搵過第份工。
不過，事情原來唔係咁悲哀，蘭西聽前鴻運僱員講，原來佢哋啱啱收到欠糧，所以大家都好開心，起碼多筆錢過年。
聽講啲後勤員工收足晒全部欠款，包括二月份嘅人工、一個月代通知金同遣散費等。據聞個別涉及嘅金額有成十幾萬。
至於前線，聽講都有得收，但個別可能因超過賠償上限，所以收唔到十足。
美聯物業睇好樓市前景，最近啱啱出咗個「駿馬奔馳」嘅電視廣告宣傳公司形象，集團顧問黃錦康話，呢個廣告原本諗住喺北京取景，因為當地馬匹大隻啲，睇起上嚟夠氣勢，點知天氣唔多好，惟有轉去曼谷拍攝，出嚟嘅效果都唔錯。
聽佢講，呢個由公司內部製作嘅廣告，連埋播放等支出要成千幾萬，認真大手筆。據聞主席黃建業睇完都話有氣勢。
黃錦康話集團日後嘅宣傳策略，會係賣多啲廣告，開記招次數就會少番啲。
香港管理專業協會每年都有「最佳年報」選舉，今年就由中電控股得到大獎，呢本年報，由九個人組成嘅評判團評定為全面、優秀同具視覺設計。而蘭西比較關心有幾多地產或有關公司攞到獎，原來地鐵同太古公司攞到「普通」類嘅銀獎；而恒隆地產就奪得優異年報獎。股東們收到年報，要睇多兩眼。
另外，其他較多人感興趣想知嘅公司，好似滙豐控股就攞到「普通」類嘅金獎，旗下嘅恒生銀行就獲優異年報獎。
蘭西
電郵地址：
