張敏與樂基兒計劃做猴年新娘，兩人都準備在農曆年後共諧連理。張敏與北京製作人男友相戀一年，對方便向她求婚；而樂基兒與「名模殺手」吳承浚將於明年四月在三藩市結婚。
張敏近年主力在內地發展，日前有消息傳出她在內地拍劇期間，認識年約四十歲、北京九洲亞華經理人公司演藝部副總經理劉勇輝，感情發展不俗，數月前男友向張敏求婚，迅速得到張敏答應，兩人預備農曆年後拉埋天窗，婚禮會在上海低調舉行，一切從簡。
三十六歲的張敏最廣為人知的一段情是與永盛電影公司老闆向華勝，數年後因了解而分手。後來張敏戀上電視導演張健偉，九九年一度傳出婚訊，但○一年後此段情亦無疾而終。此段時間張敏積極開拓內地和台灣的商界，但因生意損手今年簽下北京經理人公司，因而與劉勇輝日久生情，今年八月兩人在港購物，新男友首度曝光。
記者昨日致電恭喜張敏，她說：「如果真係結得成，我真係要恭喜自己。如果我要結婚，都要追番啲欠債，𠵱家我獨力養家，將來結咗婚，冇理由要老公養埋外家。我承認係有個做製作嘅上海男友，感情慢慢培養緊，但就未到結婚階段。至於話我男友係劉勇輝，我話大家搞錯啦！」
而名模界亦傳來喜訊，「翻版舒淇」模特兒樂基兒與男友吳承浚，將於明年四月在美國三藩市結婚，並已訂婚，婚事已通知不少模特兒界朋友。
吳承浚曾與郭富城舊愛AmandaStang、名模Danielle拍拖，有「名模殺手」之稱，他與樂基兒拍拖約一年，便決定結婚。不過，昨日演出時裝騷的樂基兒卻不肯承認婚事，她說：「冇呀，我好細個咋，得二十三歲，邊有咁快呀，唔好亂咁寫呀。」問她聖誕節與男友返美國過節，是否順道見家長？她說：「唔係呀，我喺香港冇親戚，年年都返美國過節嘅，佢（指男友）咁啱有假期，一齊過去玩啫。」
而吳承浚昨日接受本報電話訪問時，則默認結婚，他說：「啲人傳啫，你不如打畀基兒問啦，我費事亂咁講呀！到時如果落實晒嘅話，一定會講，我都希望有咁嘅機會，有咁嘅福氣。」
採訪：林妙萍
