歐陽妙芝雖身為模特兒，但原來她最愛casuelwear，冬天會以牛仔褲、皮褸及boots為打扮重點，至於如何突出整體風格，歐陽妙芝就首選桃紅色的衣物。
歐陽妙芝日前出席一個剪綵活動時，身穿一件燈籠袖珠片上衣，下襯一條桃紅色的燈芯絨褲及一對白色短boots，頸上則戴上一條珍珠貝殼頸鏈，簡便有型。她表示特別喜歡身上的桃紅色褲子，更指桃紅色將是今冬的潮流焦點。
歐陽妙芝說：「我着到紅紅綠綠，就係一個迎接聖誕嘅look，以前咁着好多人會覺得怪，不過只要識得mixandmatch就會好好睇。
「好似我今日着綠色衫加桃紅色褲，最好就係着白色鞋，因為太多顏色會唔平衡，而喺美學角度睇，黑色、白色係monotone，會令到整體感覺變得和諧。」
歐陽妙芝又表示最喜歡身上那條桃紅色的燈芯絨褲，她說：「桃紅色係今年嘅潮流主色，條褲二百幾蚊，喺銅鑼灣買，好抵。我好鍾意條褲，所以我聖誕節會再着。其實買衫唔一定要貴，最緊要係襯得好睇，着得舒服，就算係二十蚊件T恤都可以好舒服。」
採訪：楊潔雯 攝影：陳志嵐
