昨日好多股份本來都升得好哋哋，但晏晝突然回軟，部份更加倒跌，好彩經紀黃品題的紡織股表現尚算硬淨，福田實業（420）下跌1.72%，收5.65元，而魏橋紡織（2698）就升2.75%，收9.35元。
市民瘋狂認購的長城汽車（2333），雖然首日掛牌收報17.05元，較招股價高出28%，但隻股開市即抽高至22元，跟住就由開市沽到收市，噚日幾乎在任何時間買入，帳面都即刻輸錢，真係令捧場客失望。經紀陳話，冇辦法喎，鬼叫中銀香港（2388）大折讓批股破壞氣氛。
噚日升市奇葩要算嘉華國際（173），勁升10.7%，收0.34元，成交股數5308成萬股，金額7099萬元。
經紀陳話，嘉國唔係炒地產或者建築業務復甦，而係大老闆私伙投資的濠江賭場業務，就快請傳媒過去考察。雖然濠江賭場屬大老闆私人業務，但市場就繼續憧憬將來會注入上市公司裏面。
小初心諗，咁都炒得一餐，真係唔到你唔服。
慕容小初