聖誕節，送禮給至愛親朋當然唔慳得，想經濟一點，送毛公仔又或曲奇餅都可以好應節，若嫌唔夠得體，不妨從禮物包裝着手。以下兩款包裝法，都是利用日常生活的剩餘物資，然後加入少許包裝技巧或裝飾而成，不妨參考一下。
記者：吳佩璇
攝影：陳盛臣
禮物不一定要包到冚玩神秘，大膽些玩透視Feel可能更有驚喜。參考過日本雜誌後，發覺膠樽最適合放入小型公仔，然後在樽身上加點雪花及聖誕樹等裝飾，到臨送給好朋友前，再噴上白雪，就已經充滿節日氣氛！
材料：
2公升膠樽1個、聖誕膠貼紙（$15）、白色聖誕草（$25/紮）、毛毛鐵線（$5）、噴雪1支（$15）、公仔禮物。
以下這個包裝盒，最適合用來送朱古力或聖誕曲奇等小禮物。大家可以用牛奶盒來盛載朱古力送禮，牛奶盒本身可發揮的用途多籮籮，在日本雜誌上就經常被利用改裝成小型飾物盒。今次就運用摺紙技巧，為牛奶盒套上美觀外衣，想添聖誕氣氛，不妨選用白色花紙，令平凡的小心意頓成精緻小禮物！
材料：牛奶盒1個、花紙1張（$18）24cm×34cm、聖誕花1朵（$5）、金色橡筋繩（$10/卷）。
想包裝禮盒滿載聖誕氣氛，材料可集中選用紅、綠及白等顏色。而以上示範的包裝法，禮盒主體都是廢物利用，至於其他的裝飾物，也可慳得就慳。因為每年的聖誕布置，往往都有好多剩餘物資，如上述牛奶盒的聖誕花，也是我去年用剩的。連包裝花紙也可利用雜誌的聖誕廣告及海報來摺，總之大家不妨從身邊取材，過一個環保而又美麗的聖誕節。