萬人迷碧咸（DavidBeckham）同愛妻Victoria，早前以天文數字嘅價錢幫日本美容公司TBC做代言人，由佢兩公婆主演嘅最新一輯廣告最近喺日本曝光。乜形象都玩過嘅碧咸嫂，今次喺廣告入面扮煮飯婆，挑戰高難度。
今次TBC呢個新廣告，故事內容講碧咸練完波返屋企，Victoria就煮定飯準備兩公婆撐枱腳。碧咸嫂呢個幸福師奶，從來都十指不沾陽春水，我羅拉相信佢唔係為咗幾百萬酬金，死都唔肯入廚房。
碧咸喺廣告中一入門口就話：「老婆，你今日好靚！」其後煮煮吓飯嘅Victoria，竟然無端端換咗條性感開胸裙，碧咸當時梗係好震驚啦，隔咗冇耐，碧咸嫂又以肉色長裙同埋低胸晚裝裙示人，變魔術都冇咁犀利。
雖然個廣告睇到人𢱑晒頭，不過據聞箇中意念原來係話只要有愛，你嘅另一半就會愈來愈靚喎。姑勿論明定唔明，我羅拉能夠一睹碧咸嫂煮飯畀老公食嘅虛擬場面，都算大開眼界。