一味窩輪：數據唔靚華晨輪難玩

長城汽車（2333）今日掛牌，必成市場焦點，一眾汽車股相信亦唔會寂寞。上周五汽車股已經炒定先，當中以華晨（1114）最醒，彈起近8%，帶起3件華晨Call輪，全部打入5大升幅榜。
3件華晨輪當中，9298係鎖定回報輪，搞唔清楚行使條款就最好咪玩。呢類特種輪嘅資料，可上港交所網頁（www.hkex.com ），click入「上市公司訊息搜尋」欄，輸入股證編號，然後搵「補充上市文件」，就可以查到。
講番其餘兩件華晨輪，都係標準輪。9300現價99仙，明年6月初到期，溢價10.9%，槓桿率4.6倍；9361現價1.24元，明年10月初到期，溢價27.6%，槓桿率3.6倍。
兩件輪壽命有番咁上下，溢價應該高啲，但亦唔應該咁高，最弊槓桿唔得吸引。係都要揀，9300比較好啲。不過正股已升好多，提防趁長汽掛牌回吐，華晨輪暫時都係買唔過。
恒指Call輪吼位買
美股上周五微有進帳，杜指第2日企穩萬點之上收市，後市睇好，恒指Call輪可以玩多少，對象有9237、9230同9220。大市今日若開得太高，Call輪無謂追；若跌番多少，則可以郁手。
章盛