荃灣新落成屋苑名逸居，管理公司月前清洗大廈水箱時，去水喉突然淤塞，食水自水泵房湧出，波及大廈十層住戶，三十多個單位水浸，新裝修的家具地板盡濕，損失慘重，居民投訴管理公司一直拖延處理賠償問題，受影響住戶恐未能及時維修，便要在「爛屋」中度歲。
事發在今年九月二十三日中午十二時許，名逸居的管理公司為大廈進行清洗水箱時，去水喉突然淤塞，食水有如泉湧，直流而下，其中十層共三十多個單位水浸，水深逾三吋。
其中住在水泵房對面的蘇太稱，「啲水衝力好大，擋都擋唔住；冇諗過新樓都會咁，住戶向管理公司求助，但適逢午膳時間，至一時後才有人往閂水掣。」
蘇太憶述，管理公司經理曾安撫住戶，「佢話，放心，公司會安排你哋住酒店、家具存倉同維修地板。見佢咁有誠意，咪信囉；點知講完就算，我不斷追問幾時維修，佢哋竟話未知屬邊個嘅責任，叫我哋自己同公證行傾。」
她說，至上月底，住戶才收到一份賠償通知，指地板、門、牆腳線因未過保養期而「一定負責」，但其他家具裝修損失，則「唔一定會賠」。「裝修同家具都浸爛晒，佢哋竟然唔負責！」
「最荒謬係叫我哋自己先畀錢承建商維修先，再等通知有冇得賠。」蘇太指管理公司其後出了幾份賠償報價單，「賠償金一次少過一次，完全彌補唔到我哋嘅損失！」
另一住戶陳女士稱，「入伙冇半年就搞成咁，用一大筆錢裝修，𠵱家邊有錢維修？明明係佢哋失誤造成都唔賠，真係好唔負責。」她指部份單位地板因被水浸而出現發霉及損壞，甚至滋生蚊蟲，「咁拖落去，新年都唔知整好未，唔通要喺間爛屋過年？」
名逸居管理公司惠信物業管理有限公司函覆本報查詢稱，事件已交由保險公司處理，並已逐一向個別單位業主發出賠償同意書，以確認保險賠償及復修單位的安排，待業主簽署確認後，相關復修工程便可展開。
蘇太認為管理公司的安排極不合理，「咁叫我哋點應承，本來答應一定賠番大門，原來只係賠下半截（四分一），你話一道門點換一截？真係好離譜。」
名逸居承建商泰昇集團表示，當日乃管理公司清洗大廈食水箱，由於去水喉淤塞，大量食水湧出，並沿樓梯流向下層單位。至於淤塞原因則未有結論。由於保養期只包括一些非因錯誤使用或自然磨損引致的損壞，上述情況引致屋內地板等損毀，並不屬於保養範圍，有關賠償則由管理公司及其保險公司負責。
（一二○三○○四）
服務熱線
電話：29908288
傳真：23702192
電郵：
