劉德華前晚再度輸給梁朝偉，失落金馬影帝寶座，昨日華仔揚言自己絕對不會被打敗，更聲言明年一定會捲土重來。而黃秋生和吳君如等圈中好友，亦為華仔抱不平，秋生更直斥金馬獎大會不應為營造氣氛而玩華仔。
劉德華數度角逐金馬影帝均飲恨而歸，但以今次與梁朝偉同時憑《無間道》獲提名，經七輪投票僅以一票之差落敗最令人扼腕。而大會前晚在頒獎禮上刻意營造華仔必定得獎的氣氛，結果令華仔既尷尬又空歡喜一場，其好友秋生、劉偉強和鄭裕玲等，亦為華仔感不值，秋生更直言十分不滿大會此安排。
前晚大會準備宣布「最佳男主角」得主前，司儀蔡康永曾到台下訪問候選人任達華、華仔和吳彥祖。當時蔡康永問華仔：「劉德華，你有信心拿獎嗎？」又接着問任達華：「你覺得你和吳彥祖誰可以打敗劉德華？」刻意令現場觀眾以為華仔會封帝，當宣布梁朝偉才是真正得主時，在場者無不感到詫異，亦令華仔頗為尷尬。
頒獎禮後華仔便直奔影迷會聚會，在場約三百位影迷雖不斷對偶像說：「你是我們心目中的影帝。」但華仔只逗留了十五分鐘便匆匆離去。
華仔昨早由台灣返港，近百名影迷一早到機場守候，華仔笑容滿面看來精神煥發。被問到輸給偉仔可會失望時，華仔哈哈大笑兩聲，然後說：「唔會，下次重有機會。」
其後華仔又在電話中說：「我衷心恭喜偉仔得獎，其實拍《無間道》好艱辛，所以呢套戲攞到任何一個獎，我都會好開心。我唔在意有冇獎，反而在意有冇戲拍多啲，只要繼續可以拍好嘅電影，唔愁攞唔到獎。而且今次角逐係我最感動嘅一次，因為好多人都同我講，話我係佢哋心目中嘅影帝，所以我覺得有冇獎都冇乜分別。」
對於黃秋生及吳君如指摘大會故意作弄華仔一事，華仔說：「君如同秋生都係錫我啫，頒獎禮只不過係一個娛樂節目，需要營造氣氛，我真係冇尷尬喎！我當時重同司儀開玩笑，話我每一年都覺得應該係我得。我係唔會被打敗嘅，出年有機會角逐咪再嚟過囉。」
有傳華仔因落敗而缺席前晚《無間道》慶功，華仔昨否認說：「我邊有唔開心呀？我一早預咗同台灣fans聚會，所以頒獎禮完咗就即刻趕過去。」華仔並透露自前晚便不斷收到很多朋友來電，不少好友都替他不值，其中最搞笑的是曾志偉，華仔笑說：「佢第一句就用《終極無間》嘅對白，佢話：『你攞個煙灰缸出嚟打佢嘛！』我咪笑囉。」
此外，前晚奪得「最佳男配角」的秋生，昨日與「最佳導演」得主劉偉強及麥兆輝一起返港。秋生表示得獎雖然開心，但卻為華仔抱不平，他說：「一個咁好嘅人，每次都咁玩佢，搞到佢咁開心後，又即場一盆冷水淋過嚟，係咪恰佢唔識發脾氣？係我就即場發脾氣啦！」
秋生自言覺得華仔與偉仔在《無》片中同樣表現出色，他說：「其實輸贏冇問題，但今次大會就玩大咗。」
而出爐金馬影后吳君如返港時，表示稍後會舉行慶功宴，她亦表示替華仔不值。君如說：「個個人都買華仔贏，但遺憾係佢輸咗，我就好想華仔得獎，因偉仔已經攞過，噚晚兩點幾華仔有打過電話畀我，佢話冇唔開心，只係可惜唔可以同我一齊上台影張影帝影后嘅合照相啫！」
至於金馬獎頒獎禮主持人蔡康永昨表示理解黃秋生等人對大會的抨擊，他說：「因為現在最可憐的是劉德華，需要安慰的是他啦！」
採訪：蔡如玉、駱華齡
攝影：林德雄
