民建聯新人屎、新作風，馬主席又開記者會，搏命洗底，發表三點立場，第一：董政府從來冇搞過乜嘢執政聯盟，前主席曾鈺成做咗行政會議成員，任務唔係同董班子箍票；第二，民建聯今後論政，會以民意為取向；第三，曾鈺成留任行政會議，而「新馬仔」馬主席就專心黨務，暫不入「痕會」。
馬主席想洗乾淨民建聯個嘜頭，呢一點努力，係好值得讚賞，不過強詞奪理，三大立場，又講得少少牽強。
第一，董班子搵民建聯前主席曾鈺成做黨魁，唔想搞一個親董執政聯盟，唔通貪曾鈺成靚仔？曾鈺成入行政會議，係響應江澤民號召：「要更好地協助董建華執政」。所以曾鈺成先幾日亦親口承認，跟老董同特區政府拍住上，諗住係「榮辱與共」，點知就「有辱無榮」。曾「鈺」成話到明「榮辱與共」，請問嗰個「共」字點解？唔係親中愛國愛黨執政大聯盟，又何來一個「共」字？
第二，民建聯話以後論政會更好地以民意為取向，呢一樣，聽其言觀其行，香港人對民建聯冇乜信心。因為香港民意要求過梁錦松落台，民建聯保住阿松，要求過阿董落台，民建聯鑊鑊挺董，民意要求23條擱置立法，民建聯話「沒有國，哪有家」，反而痛斥香港人「冇國家觀念」，話「國家安全，人人有責」，唔理會23條草案壓制自由。民建聯呢隻馬，次次出場都「大波歐」，偏離民意軌道，𠵱家呢隻馬話會痛改前非嘞，可惜，個馬房仍然有「五粒星」。國家揼水，要民建聯愛國挺董，國家又畀唔畀馬主席嘅民建聯有獨立思維？正如香港電台，係政府供養，馬主席都一貫反對港台有「編採獨立」，話應該做政府喉舌一樣，港台都唔得，唔通民建聯得？
第三，曾鈺成留任行政會議與否，乜唔係由阿董決定嘅咩？哦，𠵱家馬力話曾鈺成留任就留任，唔通民建聯係阿董個太上皇？不過睇阿董咁嘅殘樣，馬力落咗柯打，阿董又豈敢不從？阿董既然咁聽馬主席話，不如馬主席以民意為取向，叫阿董即時養病退休，好冇？
（圖）馬主席（左三）話曾鈺成會留任行政會議，阿董又豈敢不從？
傳真︰2623-9278
電郵︰