天后濱崎步雖然喺廣告界好威，收成五百萬拍一個廣告都重可以保住「我最喜愛廣告女星」第一位寶座，不過佢唱片成績就認真麻麻，新細碟《Nowaytosay》浸咗幾個禮拜都係賣得三十幾萬隻，對步姐嚟講係近年最失禮㗎！
我羅拉就咁諗，步姐呢隻細碟封面得個包到實一實嘅大頭相，同上次着比堅尼嘅《independent》嘅百幾萬隻成績相比，梗係差得遠啦！
所以當我羅拉一見步姐過兩日出嘅新大碟《Memorialaddress》，個封面又係大大個頭，我就即刻搖晒頭，殊不知步姐今次禾稈冚珍珠，碟入面原來張張係迫爆晚裝相，確實又搏又養眼。
再睇吓步姐嘅新數碼相機廣告，佢以歐洲貴婦look示人，重帶條鬼咁粗嘅Bvlgarichoker，無非處處想表達佢女人味滿瀉嘅一面。不過，我羅拉奉勸步姐，始終靠行性感嚟keep住話題，再多兩鋪fans就會厭，係時候搵救亡方法嘞！