約咗靚女C見面，向佢請教X輪，X輪即係一些甚麼ExoticWarrants，靚女C人靚聲甜，對窩輪知識極為豐富，亦負責私人銀行（privatebanking）業務，佢何止話有前途，直情係當時得令㖭，紅到俾周刊追蹤拍照，可見佢嘅人氣暢旺也。
雖然話靚女慣咗遲到，但冇理由一早返工時間，竟然唔記得起身啩？點解過晒鐘重未見芳蹤？十零分鐘後，靚女C匆忙趕至，猛咁道歉，佢話：「香港市況一定好，明年更好，今朝call的士，加十蚊，竟然冇的士肯嚟，我見唔對路，走出門口，行咗成條街，先至搵到的士落嚟中環，真係好對唔住；我呢三年嚟慣咗電召的士到門，點知今朝竟然冇的士肯睬我！」唔睬皆因由半山區落中環，車費二十皮有找，太cheap，左丁山電召的士過海去沙田，大把的士爭住上門。
靚女C見的士唔睬佢，領略市道繁榮之外，重有其他旁證：（一）國金二期啲餐廳中午滿座，晚上佢竟然亦訂唔到位；（二）佢銀行啲經紀聽電話聽到唔得閒同佢傾偈，個個客都爭住買國企，申請長汽中壽新股，經紀生意已完全收復沙士期間嘅失地，生意額多過○二年全年；（三）好多同行已做滿○三年quota，唔想做，銀行為免佢哋放慢手腳，應承十二月份生意額可以book入○四年預算目標。
嘩，咁發達，銀行金融業今年有花紅派喇啩，恨死其他行業（如教育界要過幾年嚴冬，前途未卜。）