想要成功，除要有實力之外，都要識得形象包裝至掂。中原工商舖部上個禮拜就請嚟形象顧問大師劉天蘭，以「專業行政人員形象」為題，教同事建立形象嘅基本要素，有近二百五十位同事出席。
劉天蘭喺兩個鐘頭內，講出專業行政人員形象嘅重要性。其間請咗幾位中記同事上台，即場評估形象，透過衣飾配搭，三兩吓手勢就令到同事嘅形象水準提升。咁中記同事第日見大老闆傾生意時，就可以留番個好印象畀對方啦！「人靠衣裝」呢句話係冇錯嘅。
講開中記，佢哋早前獲委託代理SOHO中國嘅北京樓盤建外SOHO，為知道個盤係點，同埋有乜賣點，中原董事陳永傑同劉瑛琳，偕另外兩名同事，上個禮拜五飛去了解。呢次行程共三天，唔知睇完會有乜嘢促銷新招諗到呢？另外，中原助理董事王鎮維，日前就去咗深圳，教授當地同事「心態與技巧」。
近排個市旺番，恒基喺旺角嘅單幢新盤百利達廣場，過去兩日吸引五千幾人參觀，蘭西噚日下晝去睇，仍然有人龍，參觀者至少要等二十分鐘先上到樓，單幢盤都有咁墟冚嘅場面，或多或少反映樓市有支持。
聽講個盤開始收票頭兩日已經超額認購，但係發展商唔肯公布最新收票數字，不過淨係睇呢兩日嘅參觀人流，個盤開賣時銷情係點，大家都心中有數啦！
最近勁鬧政府推西九龍文娛藝術區手法嘅恒隆陳啓宗，聽講近期親自向班friend推介文娛區後面嘅君臨天下，而且重向手下落密旨，唔准講任何有關呢個盤嘅嘢，同埋除非佢識得嘅人，先至有資格預留單位，否則，唔理你係佢身邊啲愛將嘅生死之交，又或者身家多都好，完全冇面畀。不過，陳啓宗識得嘅人，來頭差極都有限啦。
另外，差唔多係現樓嘅何文田君逸山，恒隆隨時開賣，好多代理吼實。但聽講恒隆認為單位少，同區甚至九龍客源又唔少，所以冇諗住第一趟畀代理做，慳番啲佣金。
樓市雖然好咗，但要吸引買家入市，都要諗計至得，卓先董事潘子明話，佢哋上個禮拜三舉行銀主拍賣會，搞咗個買家抽獎活動，結果吸引近二百人到場。至於送出嘅獎品共六份，包括手提電話、手帳同數碼相機，全部都係名牌子同新款式產品。佢講咁做係因為銀主盤少咗，要搞吓噱頭。
呢次拍賣會總共推出四十幾個單位，成功賣出十六個，以村屋、居屋同單幢樓為主。另外，喺拍賣前又賣出六個單位，有咁嘅成績，潘子明話都幾滿意。
政府不時都會搞吓比賽，鼓勵物業管理公司參加，提升質素。好似南區區議會同政務處合辦「南區大廈清潔比賽」，啟勝旗下嘅淺水灣道3號同浪琴園，攞到私人屋苑組別及單幢式私人樓宇嘅冠軍。另外，富城集團就攞到房委會2003年度「最佳物業管理公司」大獎。
蘭西
電郵地址：
