美國女歌手BritneySpears為宣傳新碟《InTheZone》，上個禮拜去咗南韓同日本出席連串活動。近日有家庭組織話時下流行偶像愈着愈少布，唔少妹爭相模仿，造成社會歪風，而呢個矛頭就直指近年衣着同形象都愈見性感嘅Britney。
Britney日前喺漢城記招度，表示佢嘅衣着一向我行我素，佢話：「家長應該教導佢哋嘅子女，我只係着我鍾意着嘅衫，教細路唔係我嘅責任。」好自我嘅Britney喺漢城嘅小型演唱會同電視表演中，都係以惹火服裝示人，重喺台上做出摸胸同埋同舞蹈員互摸等挑逗動作，衰在台下反應極佳，唔怪得佢咁得戚。
Britney前日就到咗東京某電台會fans，着到成封利是咁嘅佢，全程賣口乖，難怪日本fans咁迷佢。Britney重提同麥當娜（Madonna）激吻，佢話其實四、五年前已經有咁嘅構思，呢個只係遲來之吻。
而咁啱得咁蹺，美國樂隊LimpBizkit上個禮拜同Britney同時間去漢城，佢哋個主音FredDurst早前同Britney甩拖後不停講女方壞話，令Britney好尷尬，據聞Britney臨出發前已了解咗LimpBizkit嘅行程表，一於避得就避。