為咗鼓勵一班清貧而又品學兼優嘅學生畀心機讀書，第八屆嘅「蘋果助學金」早喺今年九月已經開始接受全港中小學生申請，經過蘋果教育基金一班委員以學生嘅家庭背景、學業同埋操行成績等準則，作多輪評審之後，呢份熱辣辣嘅得獎名單將會喺呢個禮拜三（十七日）出爐，希望提早送份聖誕禮物畀呢班「得咗」嘅學生。
𠵱家經濟唔好，令到今年助學金一連破咗三個紀錄，首先係今年嘅申請人數係歷年最高，高達一千八百幾人，為咗回應呢班貧困學生嘅需要，基金委員會通過撥款近一百七十萬元，批出三百五十三個學生，無論喺獲助人數又或撥款金額都打破咗歷年紀錄。
大使覺得呢班助學金得主全部係實至名歸，佢哋嚟自唔同背景，當中有病患、殘疾、孤兒、單親或者係失業家庭，但個個都憑住堅毅不屈嘅精神，逆境自強，努力讀書，取得品學兼優嘅好成績，實在係值得其他學生借鏡，遲啲部份助學金得主重會喺暖流版分享吓讀書心得，大家千祈唔好錯過。
其實，𠵱家學生哥讀書嘅壓力真係愈嚟愈大，作為過來人大使覺得同學仔讀書最緊要係不恥下問，凡事盡力而為，已對自己有個交代，所以落選嘅學生亦都唔好失望，希望明年繼續努力，再接再厲。
暖流熱線
電話：29908688
傳真：23702192
電郵：
網址：