𠵱家做歌手真係好鬼歎，頒獎禮獎項就由唱片公司同佢哋「操心」，平時出席活動就有歌迷造勢。噚日Cookies、古巨基、何韻詩、吳浩康同E-kids，喺沙田一個商場入面為新城頒獎禮拉票，E-kids嘅Tommy重派投票表格畀Cookies㖭，班歌迷亦鬥得好激烈。
當中以Cookies嘅歌迷最多，而E-kids亦都唔輸蝕，兩班fans夾埋都近二百人，佢哋攞住大型橫額又叫口號，搞到現場嘈到「拆天」，最後司儀要Cookies發揮偶像嘅威力，勸歌迷靜啲收斂吓。
有班咁忠心嘅歌迷幫自己造勢，班歌手都好識做，E-kids就一邊拉票，一邊同佢哋傾偈；而Cookies就扮晒邦女郎吸引歌迷。王蓉同黃馨等新人見到咁嘅場面，惟有靜雞雞拉票，皆因佢哋嘅歌迷冇咁人強馬壯囉！
Cookies對於今年分別角逐組合、人氣同金曲獎，佢哋話：「個個獎都有信心，因為各方面都有進步。」佢哋四個人比起其他組合人多勢眾，會唔會對組合獎更有信心？Miki笑住話：「唉！讓畀佢哋啦！」
專程到台灣擔任金馬獎頒獎嘉賓嘅李安導演，噚日返台南嘅母校出席八十五周年校慶，重可以同校友兼台灣總統陳水扁見面握手。
而李安一到場，即刻俾學生重重包圍，好似天王巨星一樣咁受歡迎。
張崇基同張崇德前晚喺灣仔伊館舉行演唱會，但中午綵排時，有個女助手跌落升降台，並且壓住張崇德，女助手嘅頭部擦傷流血，張崇德嘅背部同膊頭受傷，佢哋喺養和睇完醫生後，張崇德夜晚如常演出。佢話：「我撞到膊頭同條頸，𠵱家重係好痛。」馮仁昭希望佢哋快啲好番啦！
盧巧音同余文樂呢對過氣情侶，就算喺同一個場合出現，都係一個喺東、一個喺西。不過盧巧音早前同港台做咗個錄音訪問就態度軟化，佢話：「次次出席活動都好多人睇住，有諗過走過去同佢sayhello，但唔想畀記者做話題。我冇憎或者討厭佢，都過咗咁耐，都想再見亦是朋友。」
