如果我求大俠係利物浦球迷，今季肯定對紅軍表現心灰意冷，以為近期有番起色，點知前日主場輸畀修咸頓，領隊侯利亞即刻成為被炒大熱門，認真勢危。
侯利亞現時被炒賠率已經熱到得番一點八三倍，雖然因為侯利亞領軍搞到自己有心臟病，好值得同情，但我求大俠認為，身體情況唔太理想，好難可以帶領到一支球隊爭取佳績，尤其英超聯咁激烈賽事，重要係利物浦呢類大球會，付出精神同精力更多。雖然可以指示助教幫手，但有時親力親為，效果始終唔同。
當然，紅軍現時又有奧雲、基維爾、巴路士一大籮傷兵，輸波有藉口，只不過我求大俠用中立角度睇，侯利亞放棄執教生涯，或者轉做幫紅軍搵法國潛質新星比較合適。
有留意英超聯每逢領隊或球員當選每月份最佳領隊同球員獎後，球隊例輸波，十一月份最佳領隊保頓艾拿迪斯同最佳球員奧高查，居然大破魔咒，作客打敗億萬大軍車路士。我求大俠都知呢班波好弗，估唔到贏埋，難怪艾拿迪斯賽後接受訪問，忍唔住咪咪嘴笑，個樣都幾搞笑。
史特加季初彈出之後，已開始無銳勢，輸完畀曼聯之後，日前重俾拜仁破咗聯賽不敗，𠵱家喺聯賽榜落後不來梅一分。
史特加想做冬季冠軍，周中主場對利華古遜唔輸得，重要博不來梅失分。我求大俠覺得德甲好少球隊可以由頭帶到尾，史特加都唔會例外。
季初曾經帶領柏迪遜在外圍賽擊敗紐卡素，爆冷打入歐冠盃分組賽之馬圖斯，已經辭去教練一職，準備接手執教匈牙利國家隊。馬圖斯球員時代有幾威，好多球迷都知，但教練戰績就麻麻，執教維也納迅速同柏迪遜都無大進展，今次重要教國家隊，我求大俠就唔多睇好嘞！
曼城唔單止喺打吡戰輸畀曼聯，重俾人踢爆佢哋前鋒安歷卡之前喺練習郁手打個新仔。聽曼城消息人士講，安歷卡喺呢件事上擺明唔啱，故會方亦對佢好不滿。安歷卡早前因拒參加球會一項活動而同領隊基瑾搞到好唔愉快，𠵱家又整單咁嘅嘢，睇嚟喺下月好有機會離隊。