【本報訊】「個司機撞車後呆咗，不斷撻匙反應失常，我哋驚車頭啲火燒到油缸會爆炸，咁就大鑊，決定先救火後救人！」一輛私家車昨晨在何文田公主道失事撞欄車頭着火，附近學校兩名校工衝出用滅火筒將火撲熄，任職殯儀法師的司機受輕傷，他聲稱記不起意外經過，接受酒精測試證實冇飲酒。
昨晨八時許，一輛私家車由任職殯儀法師姓陳（四十歲）男子駕駛沿公主道駛往紅磡方面，在公主道七號合一堂小學對開突然失事，撞毀三米鐵欄鏟上行人路，車頭冒煙着火。
學校內兩名校工華叔及強哥聽聞撞車巨響，即時衝出查看，發覺私家車車頭冒煙着火，立即分別從校內各取出一個滅火筒救火。
強哥稱當時情況危急：「華叔向車頭噴滅火劑，我見個司機好似嚇儍咁，重不斷撻匙反應失常，司機門鎖咗，拍門叫佢冇反應，立即用滅火筒扑爛車門玻璃窗拉開門，原來佢當時聽緊佛經。我見佢冇乜受傷，驚車頭啲火燒到油缸會爆炸，決定先救火後救人，同華叔用咗三支滅火筒將火救熄。」消防員趕至將姓陳（四十歲）司機救出，他手腳受輕傷。
現場消息稱，司機被救出時似驚魂未定，神情呆滯，被問及意外經過時不斷自言自語：「我撞咗車？我冇撞車呀！」。他送院後表示記不起意外經過，接受酒精測試證實冇飲酒。
對於成功將火撲熄協助司機脫險，華叔與強哥同聲表示十分開心，強哥更笑言：「十幾年前喺工廠打工，工廠火燭幫手救火但救唔到，呢次成功救火救人，特別開心！」
