訪問合和實業（054）主席胡應湘，話題可以天南地北，他可以從基建扯到英國曼聯足球隊，形容領隊費爵爺之所以成功，是知人善任，例如安排美國國腳侯活打龍門，荷蘭的雲尼斯達羅打前鋒。「如果雲尼斯達羅走去打龍門，都唔會打得好。」同樣是爵士的胡應湘，已安排兒子胡文新接手合和的基業，這位「胡爵爺」的部署，可否將合和帶往另一高峯？ 記者：尹彥超
胡應湘在剛過去的12月3日，度過68歲生日。他語調肯定地對記者說，到了05年12月31日，即過了70歲壽辰後，一定退休。「我只有一個最大心願，如果到時條橋（港珠澳大橋）係合和集團做，我就唔做合和公司嘅嘢，主席都唔做，踎喺地盤做總工程師。」近日與灣仔居民擦出火花的灣仔酒店項目MegaTower，在他心目中反屬次要。他說：「起酒店都係胡文新主理，唔係我做。」
對於將一家市值過百億的集團交給只有31歲的兒子，胡老父是否放心？「佢聰明過我，讀書成績好過我幾倍，我係C+級數，佢就係A級。佢喺日本三菱電機做咗3年工程師，又係史丹福MBA（工商管理碩士），有晒文憑，又喺合和做咗4年，唔係一返嚟就咁交畀佢。」胡應湘說，胡文新的長處是數據及管理。他認為兒子的管理概念比他優勝。「我係舊式，佢係新式嘅工商管理型工程師，注重數據，我就比較創作型、技術型。」
話說回來，其實胡應湘亦是繼承父業，父親胡忠是一代「的士大王」。「我老竇教我一樣嘢，力不到不為財。佢話錢係你自己捱到番來先至享受到，所以到𠵱家我重係喺度畫圖。
我好佩服我老竇，佢正正式式白手興家，由揸的士揸到有378部的士，所以係Entrepreneur（創業家），係大草E，我將呢啲概念話晒畀個仔聽，但佢接收得幾多就要睇佢；同枱食飯各自修行，但我相信佢都要好好捱下。」
胡應湘沒有從事父親的的士生意，反而在69年由父親支持創辦合和搞地產，與長實（001）、新鴻基地產（016）、新世界發展（017）、恒隆集團（010）同於72年上市，合稱為華資地產「五虎將」。
七十年代後期，合和轉戰基建項目，成為該公司發展的分水嶺。八十至九十年代是香港地產起飛時期，當其他四虎不斷建樓發財，胡應湘就到內地及東南亞尋找基建商機，可惜在泰國及印尼碰得焦頭爛額，內地公路又辛苦經營，未獲收成，合和股價一落千丈，被基金經理離棄。
今日，胡應湘與這些華資巨富仍是朋友，但依然我行我素，當社會抱怨有財團壟斷市場唯利是圖時，合和予人的感覺卻是樸實溫情，從灣仔合和中心的電梯可見一斑。這座圓柱形大廈的電梯幾乎是公共建設，讓居民學生免費使用，上落堅尼地道。胡氏指政府在中環至半山興建的自動扶手電梯，概念出自合和中心。
「合和咁多年都照顧啲學生，寫字樓未開門，我哋已經開升降機畀佢哋用，因為返學時間早啲，試過有一趟我哋自動扶梯要保養，即刻收到電話。我自己咁多年，以心為心，見到啲細路仔上落，雖然我哋用電用多咗，我哋保養維修貴咗，但係善事都做咁多，點解唔去照顧佢哋呢？」
記者相約胡應湘訪問，在早上進行，一踏入他的辦公室，只見散落桌面一叠叠的圖則，正是近期困擾他的灣仔酒店項目MegaTower。他趨前與記者握手，眼睛有點紅，看來似乎睡得不太好。談到這個酒店項目，胡應湘依然動氣，指有些灣仔居民蠻不講理。「早兩日我睇咗一場曼聯對車路士，兩隊都打得好扣人心弦，但係好彩係得一個球證一個哨子，如果場球賽個個觀眾一人一個哨子，一吹就停，呢場波你同我睇埋佢。」當日曼聯派了侯活及雲尼斯達羅落場，但最終輸了○比一，現在「胡爵爺」這一仗，賽果又會如何呢？