自10月份，本地錄得有紀錄汽車代理商嘅1,665部新車銷量後，11月份全港汽車銷售卻有放緩迹象，全月只錄得1,392部嘅紀錄，當中跌幅最明顯係日本同韓國車，合共售出773部，較10月嘅1,035部下調達262部；有此成績出現，相信與10月有多款新車大手交收後，致令11月呈現不繼現象有關。
惟11月內日本汽車銷量至高仍然係豐田及凌志品牌，其中又以後者嘅ES300（見圖）最突出，合共賣出83部；至於近期車氣急升嘅七人MPV——Picnic，亦有77部紀錄，而較大型嘅Previa則錄得有38部嘅銷量。然而，響小車界業績續領風騷嘅會係本田Jazz，11月合共售出70部車，而累積11個月嘅銷量則多達640部，可謂係同級之冠。
講返歐洲車方面，寶馬響11月合共售出177部新車，較10月份再多出38部，但始終不及呈下跌現象、響11月內共售出196部新車嘅平治；然而，響個別車款中，全新寶馬5系共售出86部新車，反而平治E-Class則只有81部；至於話響旗艦車款類別中，寶馬7系亦獨領風騷，響11月共錄得35部嘅銷量，而平治S-Class則只有9部成交。