「林伯」林百欣星期二會獲港大頒授名譽大學院士銜，同時獲得呢項殊榮嘅重有啱啱被特首委任調查巨星匯嘅律師鄭慕智、終審法院常任法官陳兆愷、電盈副主席張永霖同兒科醫生梁乃江四個人。
做得大學院士，通常都係同間大學有密切關係，出錢又出力嘅人。林伯自然當之無愧，佢捐咗二百萬支持港大教研發展基金，之後又再捐二千萬支持港大非典型肺炎基金及饒宗頤學術館嘅成立。咁下次再捐，容乜易要捐二億？至於其餘四位全部係港大校友，陳法官同張永霖係港大校務委員會成員，鄭慕智係港大校董兼畢業生評議會常務委員會委員，梁乃江醫生係港大醫學院醫學教育部成員，亦係港大醫學院名譽教授，總之幾位都對港大嘅發展不遺餘力。港大副校監李國寶會於後日主持頒授儀式。
傳真︰2623-9278
電郵︰