王菲噚日喺銅鑼灣CEONeway搞咗個簽名會，同首播佢首新歌《空城》嘅MV。阿菲兩年幾冇乜搞過簽名會，理應好墟冚至啱，點知噚日只得百幾人等簽名，好彩重有百幾人圍觀撐吓場啫，唔知係咪事前宣傳唔夠累事呢？
阿菲噚日遲咗半個鐘到場，不過佢簽名真係快得驚人，十五分鐘內就簽晒百幾個名，做埋個poster揭幕，領埋個天后獎就收工，跟住個簽名會就結束，真係眨吓眼就玩完。
圍觀嘅歌迷雖然唔多，但有啲人就好熱情，有個阿嬸一見阿菲即刻想飛撲埋去握手，阿菲見佢咁熱情，亦好大方伸隻手出嚟，點知個阿嬸死唔肯放手，嚇到阿菲花容失色，要保安救駕。
提到有假卡集團用假卡買佢嘅演唱會飛，然後轉售畀歌迷，阿菲話佢自己都係前晚接受吳君如訪問時，先知呢件事喎！阿菲一知道啲飛會作廢，就好緊張咁話：「咁就有影響呀，啲歌迷唔知買咗啲飛咁點算？可唔可以等佢哋睇完個騷先再調查，否則冇得睇好慘㗎！佢哋好無辜㗎喎。」
阿菲話佢聖誕要演出，個女就留喺北京同啲同學仔交換禮物，佢講個女時表情本來幾甜，但一提到感情生活，就即刻木口木面，佢話：「唔好問呢啲啦，我都唔會答㗎啦。」
歐陽妙芝、周汶錡同Rosemary三個名模影嗰本裸體畫冊，經過一輪互相指摘之後，𠵱家搞到要用法律途徑解決，冇份收信嘅歐陽妙芝明顯講嘢都小心咗好多，佢話：「一心做善事，點知𠵱家效果咁負面，都唔想搞到咁唔開心，最好快啲息事寧人啦。」
上山詩鈉嘅囡囡噚日幫一間童裝用品公司行catwalk，眼仔睩睩，佢阿媽重猛咁幫佢影相㖭！反而做主持嘅葉蘊儀對仔女就冇嚟到。葉蘊儀話：「我個仔唔鍾意出街嘅，個女呢幾日感冒，我咪唔畀佢嚟囉。」佢重話：「我個仔身形好瘦，好似臘腸㗎。」養到個仔咁瘦重咁開心，葉蘊儀係咪大唔透？
關心妍噚日喺杏花邨出席新城嘅活動，佢講開平時搭車嘅經歷時，話：「有次試過搭的士時個司機講埋啲變態色情嘢，佢聽見我飲嘢啲聲，就問我屙尿係咪都係咁嘅聲，我咪即刻話落車囉。所以平時夜晚搭的士，我都會同媽咪講低車牌號碼。」
薛家燕（好姨）同吳浩康噚日分別喺天后出席工展會活動。好姨就去名古屋攤位義賣曲奇為東華籌款，佢話老闆已經應承包底捐十萬蚊畀東華。好姨重即場整餅畀市民試味，搞到啲阿婆阿伯爭住攞餅食，食完重爭住買餅做善事㖭！
