講真！都好多年冇睇過正宗海盜片嘞！除咗日本動畫嘅《OnePiece》較近期啲外，再數就差唔多係十年前史匹堡所拍嘅《鐵鈎船長》，所以今個星期剛殺入碟場嘅《魔盜王：決戰鬼盜船》，齋睇題材已經相當吸引！而少人拍嘅原因好簡單，服裝、場景費貴，難拍得好也！不過今次WaltDisney在這兩方面可謂不惜工本，再加ILM最新電腦魔幻特技，《魔》絕對係海盜片嘅新典範。
記者：朱崇德
《魔盜王：決戰鬼盜船》係今個暑假檔猛片，今次出DVD亦食正聖誕「頭水」；故事講述一班邪惡嘅海盜，因盜竊了「傳說的寶藏」而中了魔咒，結果人、鬼都做唔成，在月光照射下就會顯現入魔後「森森白骨」的真身；在輾轉十多年的「魔盜」生涯中，佢哋只差一枚「魔金幣」就可以返陽為人，最後發現竟在貴族之女伊莎身上，於是將佢捉去加勒比海小島，諗住將佢生祭還清呢筆債；至於男主角維康及積克，一個是鐵匠為救愛人，一個是聞名之海盜，亦是鬼盜船的原主人，組合成二人拯救小組，與一船的「魔盜」大決戰！
《魔》的電腦特技是由拍攝《星戰前傳》及《未來報告》的ILM原班底操刀，全片共製作超過300組CG（ComputerGraphic）特技效果鏡頭！令人驚歎不已者，係將戲中演員完全CG化，在月光照射下，演員的真身及CG的「白骨」，在片中不斷互換出現，呢種新技術，已經成為今後電腦特技的新典範。
《魔》另一強銷賣點係佢嘅場景、服裝，簡直可以用勁Grand嚟形容！戲中出現的二艘戰船同一艘海盜船，都係參照英國航海歷史的真船仿製，當中不得不提的是戲中軍隊的主力艦H.M.S.Dauntless，是一艘70呎長並擁有100支火炮的大型戰艦，共用了四個月時間晝夜不停所趕製而成！另外，演員的服飾亦特意請來英國的海盜專家設計，完全參照史實，就是演員的配劍，都是如假包換的真武器！
■劇中的「魔盜」，全都以真人加CG技術製成，所以每一幕都如真似幻。
解構《魔》的出處
今次《魔》是以雙DVD碟片推出，額外收錄內容達2.5小時！當中必睇係「迪士尼與魔盜王故事」，裏面會解構《魔》的取材，原來是1967年迪士尼樂園所建成的主題公園「加勒比海海盜」，BONUS中連華特迪士尼都會上鏡，必定叫你對《魔》片加深一層認識。
《特警雄風》係今個星期新返DVD中，非常搶眼的一套戲；執導演筒的奇克莊遜，是先後拍過《紐約重案組》同《白宮群英》的著名導演，所以拍攝警匪槍戰片上，特別耳熟能詳，而且極盡寫實！
據知為拍好此片，所有演員在開拍前都要接受真正的軍警訓練！而且戲中演員的配備，都係完全參照美國特警SWAT的配備！《特》雖然未必有《黑鷹15小時》咁火爆嘅場面，但真實感絕對十足。故事講述在一次押解國際犯罪集團首腦「紅狐」的過程中，紅在電視前懸賞一億美元叫人救佢出獄，自此成個洛杉磯都火熱起來，全美的黑幫分子針對SWAT部隊進行營救行動，再加上警隊內的壞分子臨場倒戈，真係每一分鐘都充滿劇力！
必睇推介係尾場嘅小型飛機在「第六街橋」降落，編劇按照真實LA環境作出這場的部署，天馬行空之餘，又諗頭十足！之後爆發的槍戰，對罪犯、對隊友，充滿矛盾的諷刺。
蝦碌片段勁搞鬼
蝦碌片段非常正，女配角上廁所，唔小心俾廁所棍吸住屁股，好搞笑，另外重有好多軍警訓練片段收錄其中，必睇！
