有線電視猛咁宣傳林振強嘅唱片，心諗林振強係填詞人，何來唱片？呢日老婆唔抵得，走去HMV買咗一盒雙CD返嚟。哦，原來係華納、EMI、新力、BMG、永恒等幾間唱片公司聯手合作嘅產品。至於版稅點樣分，我哋懶得理咯。總之《追憶林振強》雙CD收集咗林振強一啲填詞精品，包括梅艷芳《壞女孩》、陳潔靈葉德嫻《千個太陽》、林子祥《人海中一個你》、葉蒨文《零時十分》、蘇芮夏韶聲《車站》、夏韶聲《空櫈》、葉德嫻《倦》、羅文《激光中》等等百聽不厭名曲，好值得擁有。
有咁啱得咁蹺，買完唱片，同時收到林振強太太送嚟一本書，就係林振強嘅《又喊又笑》。林太手寫幾隻字：「多謝你稱先夫振強為『特殊奇才』，附上《又喊又笑》作紀念！」真係受之有愧。左丁山以前與林振強只係見過兩三次面，交談只有一句，對佢之認識全部來自佢嘅專欄。睇完佢家姐林燕妮嘅序言，先知道呢位「特殊奇才」嘅成長過程既奇特又少有，若非佢嘅父母姊妹嘅容忍性，天才老早俾人連根拔起，但話得說回來，若非個人才能獨特，就冇資格學林振強嗰種「怪人奇行」咯。今日社會上好多邊緣少年故意逃避、扮嘢、不務正業，請佢哋買本《又喊又笑》，睇吓自己有冇資格學林振強先。
如此奇才，三十年唔逢一閏，林夕講得好：「歌詞界的達文西，集七種天才腦袋於一身，聲情並茂說故事，放下包袱，開創一代語言。紀念林振強，能做嘅嘢唔多，聽吓佢填詞嘅《追憶林振強》，睇吓《又喊又笑》，不失為最佳方法，睹物思人，亦不勝唏噓。