長城汽車（2333）同中國人壽（2628）嘅抽獎遊戲完結，恒指升到去12600點，睇番外圍氣氛，真係靚到無人有，啲三四線股仔都生猛番晒。
改行喺國內搞物流嘅意科控股（943），上個禮拜簡直係雙喜臨門，除咗新發行嘅輪升一倍外，旗下聯營公司上星期一公布拍住上海長航開發華東物流業務，星期二股價就一度以大成交升到去4毫子樓上，雖然收市回至3毫9，之後幾日都重係企喺3毫9左右無乜大動作，不過千祈唔好以為就咁玩完。聽聞公司上星期帶部份投資者直闖佢哋拍檔喺上海嘅基地，班投資者睇完之後，印象好深刻，覺得間公司好有前途。
睇番意科嘅走勢，預計今次炒上嚟之後，短期內有機會升穿埋4毫子阻力位，到時就形勢更好，如果啱價嘅話，伏勝都會買番啲嚟過年。
上個星期五對於好多散戶來講，係一個幾心傷嘅日子，皆因大多數散戶喺入飛買長汽時，一心諗住用人海戰術每人抽一手嚟增加中籤機會，點知今次只要入飛少過5手嘅申請表通通唔會過戶，即係大部份散戶連入場嘅機會都無。由於國壽嘅超額倍數同長汽不相伯仲，部份大戶預期情況會好混亂，就即刻喺個市度買番隻人保財險（2328）嚟戥住個價，結果隻股一口氣衝咗上3.1樓上，有做芬佬嘅朋友話，國壽可能唔夠貨，唔少資金會退而求其次轉買人保財險，話隻股有前途，應該有機會見4蚊，伏勝唔知佢係講真定講笑。
伏勝