張震今日在電影圈的事業，恍如一隻花蝴蝶般展翅翻飛，比其他人矚目，連外國的地方也飛到過，他的好運全因遇上比一般人多的伯樂，如果沒有楊德昌、李安、王家衞，張震的名字會一樣在電影史留下一頁嗎？然而高處未算高，張震希望自己能達致好友梁朝偉在影圈的成就。
毛蟲要經過蛹才能蛻變成蝴蝶，張震由十四歲拍畢楊德昌的《牯嶺街少年殺人事件》而一舉成名，沒有刻意經營卻偏受到各地名導演賞識，分別接拍了李安的《臥虎藏龍》、馬偉豪的《地下鐵》，以及與王家衞合作《春光乍洩》、《2046》和《愛神》等作品，星途之暢順，連他本人亦自覺幸運。
張震日前接受訪問時說：「好運？我覺得OK㗎，以前拍戲唔當係一件工作，頭三、四部戲只當係玩，直至拍《臥虎藏龍》時開始比較認真同有野心，想做好啲，令自己變化大啲，雖然初初入行一拍戲就做主角，呢幾年做配角，但唔緊要，我去學認真對待事情。」
張震擁有一張足以在影圈搵食的俊臉，但他並沒有恃靚行兇，張震說：「一部戲好難令所有人都鍾意你，惟有自己做好啲，去吸收別人嘅長處。我希望每一部戲都可以有少少唔同，但𠵱家都算尷尬期，因為未到三十幾歲有男人味嘅階段，所以要學，等可以做到三十幾歲，到時可能又希望可以做番十八、九歲嘅角色，不過最想都係可以短時間內去到一個高位。」至於在張震心目中，如何的成就才是高位？他苦思一會說：「想好似偉仔（梁朝偉）咁。」稍頓一會，他續說：「最希望自己多啲人認識，聽起嚟好簡單，但其實做起嚟好難。」
成為澤東公司旗下的藝人，張震人氣日盛，他視王家衞為知遇恩人，張震解釋說：「大家要有緣份先可以合作，雖然近年都係跟佢合作，但唔會覺得悶。因為拍《2046》嘅關係，好多機會都因為冇時間做而錯失咗，不過唔覺得可惜，總之大家互相信任。」
入行多年，張震與不少大明星包括梁朝偉、周潤發及章子怡等結片緣，問他目前還想跟哪位藝人合作？他想了一會說：「有好多，好似楊千嬅同陳奕迅，雖然《地下鐵》有楊千嬅，但我只係同董潔和范植偉有對手戲，我覺得佢哋（指楊、陳二人）好自然，所以想試吓同佢哋合作。」
