做社會福利署署長都要四圍撲，經常要出席慈善機構嘅活動，好似前晚仁愛堂去到元朗大榮華搞籌款宴，署長鄧國威都要奉陪到底，而廚神梁文韜亦親自下廚整番幾味好嘢。
仁愛堂呢次籌款宴筵開十八圍，廚神韜哥都畀面坐喺主家席同賓客傾傾講講。仁愛堂去到大榮華擺酒，都係想食番啲鄉村風味特色嘢，韜哥話當晚最特別嘅菜式，唔係濃湯雞煲翅或者清蒸東星斑，而係銅盤蒸乳豬。冇錯，隻乳豬唔係燒，而係蒸，蒸之前重要先用醋浸，再用鹽水洗，務求去盡肥膩，最後用蝦醬蒸，口感好特別。
八方應該一早警告未食飯嘅讀者，唔好睇本文，否則分分鐘睇到個肚咕咕聲，因為其他菜式都好吸引，包括薑汁冰肉燒鳳肝、炒山瑞裙、頭抽浸米鴨、太極豆苗等，最後重有奶皇馬拉盞同南瓜布甸做甜品㖭。仁愛堂主席顏寶玲話善款係捐畀弱勢社群，當然愈多愈好，咁有得食又有得做善事，都係好事。
（圖）廚神梁文韜（右）煮嘢食，仁愛堂主席顏寶玲（左）同社署署長鄧國威（中）都食到嘴舔舔。
傳真︰2623-9278
電郵︰