噚日喺中環滙豐總行樓下出現二十五個小檔口，唔好誤會係菲傭擺檔，呢二十五個檔口係由二十五間中學嘅學生開辦，佢哋參加咗「國際成就計劃香港部」（JAHK）舉辦、滙豐贊助嘅「學生營商體驗計劃」。主辦機構派咗五十個顧問，教學生營運生意嘅程序，由冇到有，再由營運到「摺埋」，其中滙豐派咗十六人做顧問。
咪睇班學生搞嘅只係「蚊型」生意，佢哋每個星期都要同顧問開會，顧問會由點樣集資講起，再教點樣組成董事會、搵產品、製造商、市場推廣……呢班學生由十月開始上堂，曾經喺自己嘅學校試吓擺檔，噚日正式面對群眾。
所謂「工字不出頭」，咁畀你做老闆，你會搞乜生意呢？八方見班學生做生意好認真，一班寶覺中學嘅學生，就喺深水埗搵咗批手掌咁大嘅發聲毛公仔，再將批貨包裝到成束花咁，送畀情人就最啱。
不過呢個展銷會只係擺一日，JAHK發言人同八方講，班學生做生意嘅成績下星期至知，顧問會同佢哋檢討結果，然後學生會喺學校或者年宵市場繼續做生意。不過，由於呢個營商計劃係想班學生體驗營運一盤生意嘅整個過程，所以無論生意幾好賺，喺十五至二十二個星期後，學生都要將自己盤生意清盤。
傳真︰2623-9278
電郵︰