過氣流行樂天王米高積遜（MichaelJackson），上個月二十號因為牽涉一單侵犯兒童案俾人拉返加州聖達芭芭拉差館。米高嘅大佬Jermaine前日接受訪問時，大爆米高喺差館度曾經受到肉體上嘅虐待，而且佢哋有相為證，暗示有人濫用私刑。
不嬲都好錫個細佬嘅Jermaine，前日接受美國電視台MSNBC訪問時話，米高去咗差館四十分鐘期間曾經受到嚴重虐待，佢話：「我哋擁有一批相片，可以證明一切。」之後Jermaine重話，佢哋會將相發畀傳媒，證明米高受到騷擾。雖然加州警方否認指控，不過米高報稱𠵱家瘦到得番百二磅，若果指控屬實，我羅拉懷疑佢唔知挨到幾多拳啫！
另一邊廂，美國有小報話米高為咗今次單案一度有輕生念頭，好彩佢老友玉婆伊莉莎伯泰萊（ElizabethTaylor）不停開解佢，米高先放棄自殺。
雖然米高單案嘅進展對佢有利，不過據《紐約日報》最近做咗一項民意調查，有成過半數嘅人相信米高真係有侵犯過今次案中嘅受害者，只有三成人相信佢係無辜。姑勿論米高今次打唔打得甩單案，佢嘅星途都可以話係玩完咁滯。