美股杜指企穩萬點，人心興奮，恒指昨日續有進帳，升幅雖然唔大，但維持良好勢頭，短期應有力再創高位。𠵱家係牛市，炒輪搵食，點都係吼低買Call着數過吼高買Put。
市況雖好，但今個月有聖誕佳節，下個月有新曆新年同農曆新年，每逢假期一多，窩輪引伸波幅例跌，簡單啲講就係溢價收縮，炒輪必須留意呢個現象。昨日就有唔少恒指Call輪縮溢價，9220係其中1例，恒指昨升39點，但9220原地踏步收2.55元，溢價就由6.2%縮落5.9%。所以𠵱家炒輪，太高溢價咪亂掂。
大唐（991）創52周新高，收報5.1元，升4.1%，帶動4件大唐Call輪打入10大升幅榜。大唐有6件Call輪，9067同9377係特種輪，炒之前記住先搞清楚發行條款，好似隻9377咁，明明係Call輪，但由於佢係「窗口定界輪」，掛牌頭兩個星期（窗口期），卻大概係當Put輪玩，所以昨日佢不升反跌。
其餘4件大唐Call輪係標準輪。9287、9222同9360年期夠長（分別於明年7、8、10月到期），溢價自然高（分別為26.9%、24.5%同19%），槓桿率冇乜特別，頭兩件10.9倍，尾嗰件更只得4.8倍。睇嚟睇去，剩低嗰件9039最靚，不過都係只啱短炒。
章盛