入伙兩年的秀茂坪公屋寶達邨，因輸水管經常淤塞，致鹹水供應受影響，「時有時冇」，長期處於間歇性供水情況，早上趕上班上學繁忙時間，更出現「搶水」情形，居民被迫用食水沖廁，浪費兼不便。
「入伙兩年、亦搞足兩年，究竟條邨嘅鹹水幾時先正常？」不勝其煩的周小姐兩年前遷進寶達邨達峰樓，但大廈鹹水供應常「時有時冇」，經常停供一、兩天，居民大感不便。
周小姐表示，居民一直忍受鹹水「時有時冇」之苦，惟多次投訴均無改善。早前更試過連續停水近一個月，至十月更只是間歇性有鹹水供應。「每日停幾個鐘，今日四點停到七點、後日停十點至二點，吓吓要用食水沖廁，真係好浪費！」
另一居民林先生亦稱，除常停供鹹水外，有時更發現鹹水內含大量水草等雜質，「聽講話啲水因未完全過濾，以致常有雜質淤塞，所以就成日要暫停鹹水嚟清理維修；既然係咁，點解唔做好過濾程序呢？」
寶達社區事務促進會主席洪錦源坦言，自入伙以來該會一直跟進該邨的鹹水供應問題。
他指問題源於兩大主因，由於寶達邨的鹹水乃由觀塘引入，而當中需經水務署負責的過濾程序，他估計可能過濾不徹底，致鹹水連帶雜質一同抽進寶達邨鹹水供應系統，令喉管淤塞及需定時暫停供水以便清理雜質。
洪錦源續稱，邨內的鹹水喉管設計亦是令問題未獲改善的原因，由於該邨輸水管設計關係，令低層水壓非常大，更常引致「爆喉」；而為避免此情況，管理公司只好將水喉「閂細啲、開吓停吓」，但早上大部份人趕着上班上學的繁忙時段，居民差不多同一時間用水沖廁，便出現供水不足致「搶水」情況，部份住戶「唔夠水沖廁」，居民極為不便。
負責管理寶達邨的富城物業管理有限公司表示，寶達邨於今年十月前曾間歇性出現停供鹹水情況，因水務署早前曾多次進行工程而需停水，恢復供應時，鹹水往往附帶大量泥沙和海藻等雜物，令減壓掣淤塞。
管理公司於事後會即時派員清洗，事前亦會張貼告示提醒居民。現時供應鹹水情況已有改善。
水務署發言人回覆稱，根據記錄，寶達邨十一月份並未有「爆喉」致停供鹹水，而十月只進行了一天臨時工程。發言人強調，每星期均到茶果嶺泵房清洗，通常只會在鹹水塘發現海藻，且情況絕不嚴重。該署現已加裝過濾網，預計兩周內完成。發言人稱，只要勤加清理大廈水箱，供應鹹水問題便可改善。
﹙一一二八○二三﹚
服務熱線
電話：29908288
傳真：23702192
電郵：
