一眾經常出入ball場嘅阿太名媛，平日買嘢好鬼豪爽，買個名牌手袋幾千蚊濕濕碎，買件衫又話萬萬聲，真係嚇親我哋呢啲普羅百姓。而有個都幾高調吓嘅名媛，一向買嘢畀自己就好捨得，身上着嘅行頭件件名牌，但對待朋友，就孤寒到笑死人。
名媛喺社交圈知名度好高，但佢嘅人緣就普普通通，朋友唔算好多，有一次佢嘅一位女性朋友生日，搞咗個生日派對，好多ball場名門貴人都有到賀，名媛就送咗一條名牌絲巾畀壽星女，重用一個好靚嘅盒裝住。本來成件事冇乜破綻，但好衰唔衰，名媛唔記得自己以前曾經攬住條絲巾，同壽星女見面，所以壽星女一望就知，名媛送嗰條絲巾，係兩年前嘅舊款，重要係佢用過嘅二手貨，壽星女就梗係唔高興啦，而呢件事傳咗開去之後，更成為社交界嘅笑柄。
張達明噚日喺尖沙嘴出席慈善拍賣活動，佢重做埋拍賣官，大搞氣氛。達明話佢太太再度有喜，希望今次可以一索得女，同囝囝湊成「好」字。問達明係唔係傳授「造人」秘訣畀佢好友吳鎮宇？達明話：「我介紹佢食深海魚。」
無綫高層何麗全因為廉署「舞影行動」而被調職，由綜藝科調去節目部，但馮仁昭聽聞無綫近日又準備調何麗全返去綜藝科，唔知係咪因為何麗全近日遞信辭職，所以無綫調佢返綜藝科當安撫佢呢？另外，無綫高層區大鈞日內將離開無綫，而方逸華愛將黃家禧就盛傳入無綫接替即將退休嘅汪岐，人事方面真係立立亂！
名模歐陽妙芝噚日喺銅鑼灣出席元氣壽司分店開幕，佢一身有型打扮到場，十分搶鏡。妙芝因為工作關係，經常要保持苗條身形，所以對飲食方面好揀擇。妙芝表示最鍾意食日本壽司，佢話：「食壽司清淡啲，魚生又唔太肥膩，好啱我口味。」
最近有報道話黎姿識咗個新男友，重俾傳媒影到佢哋一齊去英國旅行嘅相片，但黎姿噚日同馮仁昭否認有新戀情，佢話自己去英國主要係為咗陪細佬搵學校，咁啱佢嗰位男性朋友又喺英國，於是咪一齊出嚟食餐飯囉，黎姿話同對方只係好朋友，對方睇到報道都係得啖笑！
內地女子組合「女子十二樂坊」噚日專程由北京來港，出席「十大中文金曲頒獎禮」嘅記者會，但噚日只有十一位成員出席，「女子十二樂坊」將會擔任「十大中文金曲頒獎禮」嘅頒獎及表演嘉賓。
蕭正楠早排被傳媒影到佢同小師妹Toby食消夜，噚日佢喺銅鑼灣世貿中心出席活動嗰時，佢對在場記者就表現得好抗拒，重叫人唔好搞佢，口口聲聲話同師妹Toby只係普通朋友，佢話：「我哋冇同車，又冇同居，除咗我阿媽之外，冇人有我屋企鎖匙。」
